Den prensa nos por a tuma nota di e descursonan di ambos mandatario durante e apertura official di e Barcadera Containerhaven. Nos por a tende un sonjo a bira realidad …..nos por a tende ‘nos a bin hanja e plan den lachi’ y nos si a ejecute. No ta un secreto publico cu AVP su mandatarionan a para den ‘rij’ ora a worde parti ‘ser mentiroso’ y otro donnan negativo !

Tambe por a tende tanto Ministro Presidente Mike Eman como Ministro Mike de Meza referia cu ta trata un ‘vision/plan’ di hopi anja pasa…… Ministro Presidente a declara un plan di 30 anja pasa, Ministro Mike de Meza a declara un plan di 40 anja pasa y den un otro declaracion a declara un plan di 50 anja pasa. Den nan mentiranan nan mes di desenmascara nan mes. Pa pueblo comprende e historia tras di e actual vision di x Ministro Benny Nisbet cu a worde ejecuta…mester conta e totalidad hopi bon.

HISTORIA ….DECADA SESENTA !!

JUAN E. YRAUSQUIN, x ministro di Finanzas y Fomento di Antiyas Neerlandes pa partido PPA a presenta den decada sesenta su vision pa crea un di dos haf industrial na Aruba. Pa logra esaki gobernacion di PPA a larga crea dos entrada den e ‘rif’ na Baradera y construi e ifnrastructura necesario e tempo ey. Tur locual a costa afl. 12.650.000,--. Fecha 30 di December 1961 tabata un dia historico ora sr. Juan Enrique Yrausquin a exploita un pida dinamiet pa symbolicamente inicia e trabao den locual a bira officialmente e haf di Barcadera. Tambe ministro Juan E Yrausquin a logra pa un compania establece su mes riba e tereno Industrial cu tabata A.C.I. Aruba Chemical Industries. Prins Bernhard q.e.p.d. a habri e planta quimica na Barcadera fecha 10 di December 1963. E planta a funciona pa 17 anja y hopi barco grandi a mara na e haf di Barcadera. Despues cu na 1970 e planta a sera su porta e haf di Barcadera a worde usa mas tanto pa ‘bulk’ esta ora trece p.e. santo, cement etc. …pero no pa su destinacion real cu tabata pa Industria etc… Cu otro palabra e vision di PPA di sr. Juan E. Yrausquin den decada sesenta a worde realisa y a funciona durante un 17 anja !!

DECADA NOBENTA….VISION PA MUDA CONTAINERHAVEN PA BARCADERA !!

Na 1993/1994 mi persona a bira Ministro di Transporte y Comunicacion despues cu ja kaba na 1986/87 mi a funciona como tal y despues cu tambe mi colega sr Elio Nicolas a funciona como Ministro di Transporte y Comunicacion 1989 pa 1992. Tambe mi tabata President comissaris di APA NV. Durante e periodo ey nos a dedica basta atencion na discuti e pregunta si lo no tabata bon pa muda Containerhaven for di Oranjestad pa Barcadera. Tambe den nos vision esaki lo a larga hopi espacio liber na Oranjestad locual lo por worde usa pa un ‘upgrading’ di e terminal pa Cruise Ships specificamente y su infrastructura necesario cual lo duna Oranjestad un bida commercial nobo.

Nos a hinca e vision aki den otro…lo muda Containerhaven pa Barcadera…..muda Free Zone pa Barcadera……ejecuta su infrastructura esta construi e vierbaansweg for di San Nicolas pa Oranjestad, ejecuta e asina jama ‘ringweg 3’ y ejecuta un Aruba World Trade Center y ‘upgrade’ aeropuerto di Aruba pa por ricibi mas ‘freight’. Na januari 1994 nos a ricibi un Top ejecutivo di E.C.T. (Europe Container Terminal) y nos a duna nan e tarea pa cuminsa studia e asunto y presenta nos un plan den future. Na maart 1994 un delegacion encabez pa Ministro Benny Nisbet a bishita Oficinanan di ECT na Hulanda na unda 1. Nos a firma e contract di ‘consultancy’ officialmente. 2. Y na unda un presentacion a worde duna door di ECT na e delegacion di Aruba di e mudamento etc.

Na regreso pa Aruba mi a duna un presentacion den Conseho di Ministro despues di cual mi a bai na un commission di Staten pa informa nan di nos vision. Na final di mi presentacion e Lider di fraccion di AVP sr. Henny Eman cu un stem masha rabia a declara……e vision aki …..ta mucho grandi……mucho placa…..y cu e stem rabia el a bisa LUBIDA……ba tende…..LUBIDA…!!!

PPA como UNICO partido politico a keda presenta nos vision y plannan sagradamente dentro di nos vision mayor pa hasi Aruba un HUB den Caribe….!! Mester muda haf di Containerhaven for di Oranjestad pa Barcadera…..anja den anja for. Lamentablemente NI gabinete Henny Eman 2 y 3, Ni gabinete Nelson Oduber NO a pone e vision aki como prioridad.

Algun dia despues Ministro Presidente Nelson Oduber cu a bai Hulanda a regresa y a informa PPA y ADN cu nos lo mester bandona gobernacion pa MEP forma un gobierno cu AVP…….pa jega un gobierno cu un ‘brede draagvlak’. E esfuerzonan aki a fracasa y MEP a keda sin su gobierno y mester a confronta eleccionan. Resultado tabata……. Cu Gabinete Henny Eman dos a worde forma door di AVP./OLA.

Pa kita e ‘stempel’ cu ta PPA su vision a duna e tarea di compila un estudio na un grupo Cubano estableci na Miami …hopi tempo a bai perdi sin resultado.

Na final di gabinete Henny Eman tres ora cu Ministro Robertico Croes a bira Lider di AVP y tabata preparando pa bai eleccion derrepiente e ‘vision’ aki a worde presenta na pueblo como ‘vision’ di AVP y Robertico Croes. PPA for di pafor di parlamento a bringa e informacion formalmente cu documento, potret etc……., cierto momento AVP a keda keto ora nan a ripara cu nan no por a logra bende esaki na opinion publico.

Eleccion a trece Gabinete Nelson Oduber 3 y 4. !! Durante e periodo aki repetida vez PPA for di oposicion a recorda riba e vision y plannan aki pero lamentablemente e NO a bira ‘prioridad’ bao di gobierno Nelson Oduber.

Cu otro palabra ora cu Ministro Presidente Mike Eman declara cu ta un vision/plan cu nan a hanja den ‘lachi’ y cu gobiernonan den pasado no tabata por……..primeramente e ta referi na gobernacion di su propio ruman homber Henny Eman(AVP) cu deliberadamente No tabata kier a ejecuta ‘vision’ di PPA y tambe gobernacion Nelson Oduber(mep) cu no a no a duna e vision aki e stempel di prioridad.Aki 15 anja a bai perdi !!

KIKO A CAMBIA Y A PONE CU GABINETE MIKE EMAN A DEDICA ATENCION NA E VISION AKI DI PPA ?

E hecho cu Ministro Mike de Meza a ‘traiciona’ PPA y a drenta AVP a trece e cambio !! Ministro de Meza siento un x miembro di PPA tabata conciente di e impacto di e vision aki como cu den Partijraad di PPA, Benny Nisbet ex ministro y esun cu e hinca e ‘vision’ aki den otro a splica esaki repetida vez. E a convence seno di AVP cu e vision di PPA/Benny Nisbet tabata correcto. Y cu a perde suficiente tempo un 20 anja ….y si Aruba kier bira un HUB tur cos ta inicia cu ejecucion di e vision di PPA. Y esey a bira realidad. Awor falta ringweg 3 y duna contenido na e vision di PPA pa Oranjestad pa cu e terenonan cu a bin liber.

PPA kier felicita gabinete Mike Eman cu e logro aki !! PPA kier felicita Pueblo di Aruba cu e logro aki !! PPA no tin problema pa reconoce cu ora algo bon a worde hasi/logra …tampoco PPA no tin mester di horta ‘vision’ di otro …..nos tin suficiente pluma/vision di nos mes !! Den otro articulo nos lo demonstra con nos a tene e lucha pa hasi Aruba un HUB international y con nos a tene e ‘vision’ di PPA/Benny Nisbet bibo bibo ….cu resultado nan un gobierno a realisa …….PPA/BENNY NISBET tabatatin razon !!

Aruba, 3 di april 2016
BENNY NISBET
Lider Politico di PPA

Expresionnan haci den e articulo aki no necesariamente ta refleha opinion di ArenaPoliti.co