Relaciona cu e situacion di cual Centrale Bank di Aruba a publica cifranan di pais Aruba pa aña 2015, cualnan ta diferencia barbaramente for di esnan relata door di CAFT pa e mesun periodo, un parlamentario Hulandes a lansa algun pregunta na e minister di Binnenlandse Zaken en Koninkrijksrelaties, sr. Plasterk. Loke mester remarca ta, cu e serie di preguntanan ta cuminsa na un nivel hopi basico y ta indica claramente cu esun cu mester contesta, ta wordo husga di ta na un nivel di conocemento hopi limita. Prueba di esaki ta cu e prome pregunta ta papia di si e minister ta di opinion cu Aruba su gobierno actual no ta uno cu recientemente a ser substitui? Ta for di 2009 AVP ta na mando na pais Aruba. Con Plasterk no por sa esaki? E di dos ta puntra di e minister ta na altura di cu si Aruba su gobierno no ta un gobierno di coalicion? Ta un solo partido ta forma e gobierno di mas malo cu Aruba a yega di conoce cu ta AVP. E di tres ta puntra si e minister ta di opinion cu e e situacion financiero na Aruba ta uno pesimo? E propio minister Plasterk tabata envolvi den e KB cu gobierno Hulandes a manda pa gobierno di AVP na 2014! Tambe Plasterk a firma e protocol hunto cu sr. Eman y sr. Bermudez pa e ley di financieel toezicht (CAFT) na 2015. A base di cual prospecto e ley di CAFT a bini pa dilanti y bira vigente na 2015? E di cuatro ta puntra si e minister di Hulanda a bay di acuerdo pa Aruba busca e posibilidad di presta placa internacionalmente? Esaki segun e propio relato di CAFT ta papia cu si, pero pa paga debenan cu ta vence y NO pa cubri e deficit presupuestario! Aki gobierno di Aruba mester tuma medidanan pa baha e gastonan astronomico di gobierno. Minister Bermudez a caba di bin di Merca unda cual el a mendiga na mas cu 25 instancia financiero pa busca placa fia! E di cinco pregunta ta papia di si minister Plasterk por realmente bisa cua ta e deficit financiero di pais Aruba pa cu 2015! Aki siguramente sr. Plasterk ta bay contesta cu mester warda te na mei 2016 ora cu e jaarrekening keda cla y CAFT/CFT saca nan conclusion definitivo. PUES, e sa net net nada! E di shete pregunta ta indica cuanto confiansa e parlamentario Bosman tin den e minister! Den esaki e parlamentario ta pidi pa e minister contesta e preguntanan individualmente! Pues un pa un. E parlamentario ta duna di conoce cu e minister ta un persona cu ta Mike-complaciente. Den tur cos pa e minister, sr. Eman ta haciendo bon. Pesey e parlamentario ta lansa e preguntanan manera na un mucha di 3e klas lagere school. Aruba, at least tin un parlamentario Hulandes cu si ta interesa di sa mas y di kier prueba cu e gobierno di AVP ta un gobierno incompetente. Nos ta keda curioso pa sa kico y con e minister Mike-complaciente ta bay contesta.

Expresionnan haci den e articulo aki no necesariamente ta refleha opinion di ArenaPoliti.co