Gabinete ME II: Siguiente fase di Green Corridor ta continua cu bashamento di asfalt
ORANJESTAD- E inmenso proyecto 'Green Corridor' ta bayendo segun plan. E proyecto aki cu ta segun e sistema PPP (Public Private Partnership) mescos cu e proyecto di waf di Barcadera, ringweg di Oranjestad y construccion di hospital nobo, tabata nada mas cu plannan drumi den lachi. Un gobierno diligente a saca nan di den lachi y a busca e miho forma con financia nan, mantene nan awor y den futuro y un tras di otro proyectonan a inicia. Waf di Barcadera, un proyecto cu a drumi den lachi pa 50 aña, siman pasa a keda oficialmente inaugura. Un bunita proyecto cu ta hiba e isla aki dilanti.
Proyecto Green Corridor ta otro proyecto cu tabatin mas di 20 aña drumi den lachi pa wordo ehecuta. A sak'e di lachi y a cuminsa traha duro y bon intencion pa construi e caminda aki cu ta asina necesario. Awor Green Corridor ta bay conoce un fase nobo di avance. E fase unda ta bay basha asfalt pa construi e camindanan na banda. Cu construccion di e vierbaansweg, e fluho di trafico entre Playa y San Nicolas y vice versa ta bay ta mas lihe.
Gobierno a pone como meta no solamente pa alivia e necesidad pa mas vialidad creando un caminda di cuater via cu ta facilita e trafico, pero tambe mehora e calidad di bida di tur esnan cu ta biba cerca di e caminda den otro aspectonan. A duna e tarea na arkitecto y ingenieronan pa crea areanan berde cu hopi mata y espacio pa pasatempo social. Di e manera ey, e proyecto aki ta mehora e espacio entre caminda grandi y e casnan na ambos banda cu sigur ta un contribucion hopi grandi pa e calidad di bida di e ciudadano cu ta biba di Pos Chikito te cu San Nicolas.
Expresionnan haci den e articulo aki no necesariamente ta refleha opinion di ArenaPoliti.co