Manera ta conoci e rapport financiero di e 4to kwartaal 2015 di pais Aruba a wordo entrega y evalua door di CAFT. Loke a resalta den e rapport aki ta cu a registra un aumento considerabel di entrada di impuesto mientras cu na e banda di gastonan gobierno no kier mustra cu e kier baha esakinan. Pero e rapport mes en general ta uno hopi "rooskleurig" dunando un imagen eroneo di e realidad financiero pa loke ta trata 2015. Apesar cu a registra un aumento di impuesto door cu a introduci e pago adelanta riba aangifte winstbelasting (VAS- systeem) y a castiga pueblo cu cobransanan di belasting e cifranan ta keda cuestionabel pasobra a konkel cu nan net pa por cumpli cu e norma. Pero tampoco mester lubida cu na un promer instante cu a introduci e "VAS- systeem" AVVB a duna di conoce cu mayoria lo no por cumpli cu e deadline prome cu 30 december 2015. Dus mayoria di e companianan a paga den 2016 y no den 2015. Ademas e "rooskleurigheid" cosmeticamente a wordo yuda cu rancamento di miyones di dividend for di companianan estatal y un exoneracion di 60.5 miyon florin di un debe cu Gabinete Eman tin cu fondo di AOV. Mientras pueblo si no a haya pordon na nan man pasobra a aumenta edad di pensioen 65 aña, aumenta prima, aumenta premiegrens y asina nos por sigui. 

Cifranan 4to kwartaal 2015  VS Banco Central 
E cifranan entrega na CAFT door di Gabinete Eman a ilustra 1.252,8 biyon na entrada di impuesto y un suma di 1.350,9 biyon na gasto. Consecuentemente esaki ta pone cu lo yega un deficit di 98 miyon (2%) cumpliendo cu ley CAFT cual Colegio di supervision a admiti pero si cu yen di duda. Logicamente e duda di e Colegio di supervision CAFT no por wordo tuma na malo ya cu Gabinete Eman nunca a cumpli cu ningun cuadro financiero y door cu nan careda di cabai y gastamento di placa a wordo frena cu supervision ta play un gobierno responsabel. Pero un biaha mas nan ta malinforma pueblo pasobra cifranan di Banco Central a ilustra 1.202,5 biyon na entrada di impuesto y un suma di 1.373,2 biyon na gasto. Cual nifica aproximadamente 50 miyon florin menos na entrada y 22 miyon florin mas na gasto. Resultando den un deficit di 201.7 miyon (4.02%) cual ta mas cu e dobbel di loke Gabinete Eman a duna di conoce den su rapport financiero di e 4to kwartaal 2015.

Gabinete Eman no ta cumpliendo 
Kiko bo por saca afor di esaki? Cu atrobe Gabinete Eman no a cumpli cu Balanced budget akkoord, no ta actuando responsabel, ta sconde informacion. Pa colmo ta resulta cu awor cu e cifranan di CBA a sali cu Gabinete Eman ta konkel cu cifra, manipula CAFT , manipula pueblo completo pa por logra haya un "positief advies". Den henter e desaroyo financiero e ta importante pa pueblo realisa cu banda di manipulacion y konkelmento cu cifras cu despues di 3 aña desde cu Hulanda a pone un KB na 2014, a pone curatela financiero total riba Aruba via e ley di CAFT na 28 di augustus 2015 ainda Gabinete Eman no por logra cumpli cu nan priopio normanan y esunan fiha den articulo 14 di Ley CAFT. Laga nos no lubida e hecho cu na 3 ocasion a ignora deadlines (1 augustus 2015, 15 december 2015 y 31 januari 2016) cu awor a resulta e ultimo DEADLINE cu ta mei 2016. Realidad ta cu Hulanda a duna Gobierno di AVP e oportunidad pa cumpli cu recomendacionan di CAFT pa por logra un balanced budget door di entre otro e ABB pero tambe reduci gastonan personal y general. Ora cu Minister Bermudez a bai pa aplica e recomendacionan aki den presupuesto di nos pais Prome Minister Eman no tawata kier y ta duna indicacion di kier "get rid " di su di 3 Minister di Finanzas, pasobra loke Minister di Finanzas Angel Bermudez kier haci cumpli cu CAFT, no ta cumbini Prome Minister Eman POLITICAMENTE! No ta solamente e mandatario di finansas sino tambe Minister Otmar Oduber, ora di entrega su carta di retiro na Gobernador a laga sa cu Mike Eman no kier cumpli cu afspraaknan cu CAFT. 

Tur e hechonan aki ta ponebo realisa cu no ta for di awor Gabinete Eman no kier cumpli cu normanan, acuerdonan y cu konkelmento cu cifranan ta  mustra desesperacion pa crea un impreshon cu nan ta bon bezig mientras cu datonan di Banco Central di Aruba ta desenmascara nan falsedad y realidad cu e deficit dj 2015 ta dobbel di loke Gabinete Eman ta pretende. Si sigui asina e lo no ta un sopresa cu Hulanda por duna Aruba un aanwijzing , si Prome Minister Eman no cumpli na mei 2016 cual lo por nifica un AMVRB ( Algemene Maatregel van Rijksbestuur ) cu ta ensera CURATELA TOTAL PA ARUBA! Pesei mes Gabinete Eman no por kere cu e ta konkel cu cifra y ta spera pueblo bati man pa nan!

Expresionnan haci den e articulo aki no necesariamente ta refleha opinion di ArenaPoliti.co