ORANJESTAD  – Tempo cu ehecutivonan di Zara a bin Aruba pa prome biaha pa evalua nos isla pa nan establece nan mes, Gobierno di Aruba apenas a cuminsa cu e plan di revitalisacion di Oranjestad y pesey tabatin mas di conta cu di mustra. Awendia esey ta totalmente diferente y e apertura di e mahestuoso tienda di paña ta e mas reciente piedra precioso pa dorna nos centro di ciudad.

“Mi ta sumamente contento y honra pa e confianza. Nan a tuma un decision hopi grandi pa establece aki apesar cu tabatin hopi di e otro islanan Caribense cu nan bishita. Finalmente scoge Aruba pa pone e Zara di mas moderno cu tin na mundo den nos centro di ciudad,” asina Prome Minister Mike Eman a splica riba e anochi di e apertura di e marca Spaño dilanti di Plaza Daniel Leo.

Zara ta un nomber reconoci na mundo; e ta un marca sumamente popular e innovativo cu continuamente ta crea tanto den e producto como e forma di presenta e producto. Pa Aruba cu ta hibando un maneho di renobacion y modernisacion, ta eleva e calidad di tur loke nos por ofrece. Nos pais y su Gobierno a ofrece e multinacional di moda un clima atractivo di inversion, un estado di ordo legal y estadisticanan turistico favorabel.

Adicionalmente, tambe ta representa un orguyo pa nos isla e hecho cu di e 67 empleadonan cu e tienda a tuma te aworaki, 65 ta local. “Ta yena nos cu hopi satisfaccion cu a haya na Aruba hende cualifica y cu bo por confia pa bo realisa e bon servicio cu Zara ta duna rond mundo,” asina Premier Eman a comenta.

Nos Prome Minister a reconoce cu tin opinionnan cu ta cuestion e magnitud di e negoshi y e impacto cu e por tin riba e comercio en general. E ta kere cu Zara Aruba ta bay traha manera e anker na inicio di caya principal di Aruba cu lo atrae hopi cliente pa drenta, pero un bes den caya, tambe lo bay di biaha pa e otro tiendanan.

E hecho cu e corporacion responsabel pa Zara, esta Inditex a tuma e decision pa e tienda na Aruba tin e prijsnan di mas competitivo den nos region ta contribui na e atractivo pa e clientenan. “Mi tin pleno confianza cu esaki ta un gran aporte na e comercio di Aruba pa su beyesa, producto y calidad, pero tambe como atraccion pa centro di ciudad cu lo trece hopi cliente,” Prome Minister Eman a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co