Ehecutivonan di UNDP a bishita Aruba pa discuti metanan global sostenibel.

ORANJESTAD - Ehecutivonan di United Nations Development Programme (UNDP) tabata na Aruba pa un par di dia pa discuti e 17 metanan global sostenibel di Nacionnan Uni y mira con leu Aruba ta y unda y con nan por duna sosten. Despues di reunionnan intensivo y varios encuentronan, deputy pa UNDP sra. Richards-Kenney y sra. Cooper-Lee, program Officer di UNDP e sinta cu Prome Minister Mike Eman y parti di su staff envolvi riba e tereno aki. Prome Minister Eman a bisa na final di ta satisfecho cu e bishita. "Nos ta sigui construi riba un relacion cu nos a bin ta desaroyando ultimo tempo cu Nacionnan Uni."

Eman a splica cu pa hopi aña Aruba ta forma parti di programanan di UN, sea via Reino of via e base Caribense. "Ultimo tempo door cu nos ta trahando riba un base hopi estrecho cu Reino Hulandes y specialmente cu Relacionnan Exterior di Hulanda y embahador di Reino na UN sr. van Oosterom y door cu nos ta contribui na temanan importante di UN y tambe den henter e proceso di eleccion den cual Hulanda ta participando como candidato pa logra un asiento den Conseho di Seguridad, nos relacion a bira mas fuerte, solido y intenso. Aruba ta un ehempel con otro SIDS (Small Island Developing States) por supera retonan cu nan tin como pais. Esaki riba tereno economico, social, ecologico y di energia. Tin un entusiasamo grandi di parti di UN pa traha cu Aruba, pasobra cu nan ta sinti cu Aruba a pone un ambicion cu nan lo tin gana pa otro nacionnan isleño (SIDS) tambe braza. UN ta haya importante tambe pa etala Aruba como ehempel cerca otro islanan. Hopi bes e islanan tin e tendencia di pensa cu door cu nan ta chikito y no tin e finanzas y ambicionnan y tanto UN como tambe paisnan grandi manera Merca ta contento y orguyoso di mira con Aruba no ta biba cu e pensamento di tin e limitacion cu pasobra nos ta un isla nos no por ambiciona di tin un calidad di bida halto pa nos conciudadanonan y cu nos tin un meta hopi cla pa conecta desaroyo economico na un bienestar general." Eman a splica cu tur esaki a haya un dimension universal ora UN aña pasa, despues di a inventarisa mas di dos aña kico ta e deseonan di paisnan rond mundo pa pone como meta pa e añanan cu ta bin te cu 2030, a lanza e 17 metanan global sostenibel. Metanan riba diferente tereno cu durante e dianan cu a pasa a wordo discuti cu gobierno, universidad, sector priva y otro institucionnan na Aruba.

Presente na e reunion cu e ehecutivonan di UNDP tabata tambe hefe di departamento di Asuntonan Economico sra. Maria Pita.

Expresionnan haci den e articulo aki no necesariamente ta refleha opinion di ArenaPoliti.co