Infrastructura di cayanan, di scolnan, hospital y complehonan pa deporte, barionan di bibienda, wafnan y aeropuerto, edificionan pa duna servicio na pueblo. Tur esaki y mas ta e infrastructura di nos pais. Pa hopi aña e infrastructura di nos pais a keda sin haya e inversion y renobacion cu e merece. Consecuencia tabata cu nan a bay masha atras, deteriora y no tabata adecuado mas. Mucho poco scol a haya e mantencion cu nan mester pa sirbi nan meta. Edificionan di gobierno a bira ruina. Nos ciudadnan, specialmente San Nicolas a cay hopi atras. Centro di Playa a bira un area di drogadicto mahos. Mescos a sosode cu nos barionan. Nos hospital ya tin mas di 40 aña cu e no a haya e mantencion y renobacion cu un hospital tin mester pa por sirbi como luga pa cuida y yuda hende malo bira bon. Nos cayanan a haya "recap", pero e cantidad di auto na Aruba ta sigui crece asina lihe, cu specialmente e camindanan grandi no ta capacita mas of tin e calidad pa sigura un fluho di trafico eficiente y sigur.

INVERSION PA RENOBACION
E renobacion di e infrastructura di nos pais a bira asina importante, cu tabata irresponsabel pa no inverti mas y mas lihe. E calidad di bida den nos pais tabata bayendo atras lihe. Ta cu e necesidad grandii aki den mente, gobierno di AVP a inicia e proceso amplio di renobacion di nos infrastructura seis aña pasa. Haciendo esey a inverti miyonnan di florin. Awe tur hende por wak unda tur e placa a bay y kico Aruba ta haya!

CRITICA
Oposicion a critica e inversionnan aki masha hopi. A yama esaki innecesario, gastamento di placa, a bisa cu "pueblo no por come klinker". Hasta e cuponan di trabou y e stimulacion di economia, cu e inversionnan den infrastructura a crea, mescos cu ta sosode tur rond di mundo, no tabata bon pa oposicion. Anto e mes un oposicion a haya cu mester a inverti mas den nos hendenan. Pero awe e mes un oposicion ta critica cu a gasta mucho placa na indexering di salarionan di maestronan di scol y empleadonan publico, na paga bevordering innecesario, a gasta placa na reparatietoeslag di 50 mil trahado den sector priva y na 20 mil pensionado. Tur e miyonnan di florin tur aña durante di e ultimo 5 aña, no mester a bay den "nos hendenan" segun oposicion. Pasobra ta 1% so a inverti den infrastructura. E resto cu a bay den "nos hendenan" no ta inversion. Pa oposicion e ta gastamento di placa. Kier men ni den nos hendenan y tampoco den infrastructura ta bon. Ta kico oposicion si tabata kier ta keda un misterio cu ta destapa nan politica bashi y populismo sin destino.

Expresionnan haci den e articulo aki no necesariamente ta refleha opinion di ArenaPoliti.co