Durante di tratamento di e presupuesto di DOW pa 2016, e partido MEP a purba critica e maneho di infrastructura cu e insinuacion cu e cantidad di peticion pa construccion lo a baha. Si e miembronan di MEP lo a haci un tiki "huiswerk" nan lo por a haya sa cu nan ponencia ta completamente for di sla. Cu e ponencia aki MEP kier a duna un indicacion di cu economia ta malo. E berdad ta cu construccion ta un indicador di actividad economico y di inversion. E realidad ta contrario y e ehempel cu MEP a scohe pa usa a mustra cu nan no ta pone atencion na nan trabao, nan no sa di kico nan ta papia of cu nan ta wordo masha mal informa.

E REALIDAD
E realidad ta cu ta for di aña 2005 bou di gobierno di MEP, e cantidad di peticion pa construccion a baha continuamente. (Wak egrafico akibou.) E caida a yega su punto mas abou na 2009/2010 mei mei di e crisis. Pero e caida a cuminsa ya for di cuatro aña prome cu e crisis. Kier men cu no por culpa e crisis pa e caida grandi den añanan 2005-2010. E realidad ta cu den e añanan bou di gobierno di MEP costo di bida y costo di construccion a aumenta barbaramente. E causa no tabata bini di pafo y tampoco tabata bin di e maneho di e minister di infrastructura. E causa tabata e incapacidad di e gobierno di MEP pa frena maske ta un tiki e costo di bida. Mester corda cu na aña 2006 a introduci e BBO. Esey a yuda hisa e costo di bida enormemente. Den e periodo di gobierno di MEP di 2001-2009, costo di bida a subi cu 24%. Den e mes un periodo aki salarionan a keda pega y den niun forma gobierno di MEP a ni considera pa yuda famianan cu ta depende di un salario. Costo di haci negoshi a subi, sin cu tabata tin ni e oportunidad pa doñonan di trabou y inversionistanan sinta na mesa pa papia di frena e costo halto. Ta e maneho destructivo aki di MEP cu ta causa di e caida di peticionnan pa construccion.

Realidad ta tambe cu for di 2011 bou di gobierno di AVP e cantidad di peticion pa construccion a bolbe subi. Na 2014 e cantidad di peticion pa construccion a surpasa e aña 2008 cu segun MEP tabata e miho aña den historia di Aruba. E caida leve di e cantidad di peticion na 2015 ta debi na e inseguridad cu e intervencion innecesario, inefectivo y illegal di Hulanda na 2014 a causa. Ta bon pa Pueblo wak con e partido MEP no solamente ta troce berdad, pero nan ta simpelmente bisa cosnan foi sla y acusa sin sikiera haci un tiki "huiswerk" prome cu nan papia. Di berdad Pueblo no por confia MEP.

Expresionnan haci den e articulo aki no necesariamente ta refleha opinion di ArenaPoliti.co