Durante e rueda di prensa Partido Democracia Real, Andin Bikker a trece dilanti cu den nos Constitucion ta para cu nos ciudadanonan tin derecho di asistencia huridico, di parti di Gobierno.

Esaki tin di haber tambe cu e derecho di proteccion den casonan administrativo, casonan di LAR, ora un ciudadano tin algo contra gobierno y no por paga un abogado,  pero e derecho aki no ta wordo duna.

Loke ta sosode awor aki ta cu cada bez cu un persona tin un conflicto cu gobierno y no tin manera pa paga un abogado, e no ta haya ayudo huridico di gobierno pasobra nan ta lantando un caso contra gobierno.

Den nos constitucion specificamente ta bisa cu e ciudadano cu ta den conflicto cu gobierno tin derecho riba asistencia huridico gratuito, financia door di e sistema di gobierno.

Pa tal motibo e pregunta cu PDR ta bay lanza na Minister di Husticia y esnan encarga ta, con bin cu ta selecta, contra nos Constitucion, si un persona ta haya asistencia huridico paga door di gobierno si of no.

Esaki ta conta pa un persona, un compania of un instancia di gobierno mes. E no ta husto, segun e Parlamentario, cu un minister cu no ta paga abogado for di su saco, por persegui un hende huridicamente, nengue un verordening, y e por haci tur sorto di cos, pero ora un persona no por paga un abogado, e no ta wordo yuda y ta haya como contesta cu ley no ta premira esaki y maneho di gobierno ta cu nan no por bay paga pa un hende bay lanta un caso contra dje.

Pero e minister, basicamente, di su begroting ta paga pa comete un inhusticia contra un ciudadano.

Andin Bikker  a acentua cu PDR den gobierno, ta bay percura pa reforma e sistema di proteccion legal di e ciudadano, ta bay amplie manera nos Constitucion ta prescribi, cu ora un hende tin un caso contra gobierno y no por paga pa haya asistencia huridico den e casonan aki y tambe tin un parti den e leynan di derechonan humano cu ta specifica den e dimension aki.

Expresionnan haci den e articulo aki no necesariamente ta refleha opinion di ArenaPoliti.co