Asociacion di comerciantenan na Mallorca, Spaña

E fenomeno di All-inclusive y su impactonan negativo pa cu economia di e pais ta un topico cu tur rond di mundo a discuti. Dentro di poco Aruba lo ta tratando un regulacion pa locual ta trata acomodacionnan All-inclusive den un forma di ley den Parlamento.
Gobierno di Aruba ta para pa bienestar di Aruba, y ta kere cu regulacion di e fenomeno aki lo por frena un 'spinoff' negativo pa economia di nos Pais.
Den un articulo di HOSTELTUR, comerciantenan di Mallorca a vocifera cu All-inclusive ta 'pan pa awe y hamber pa mañan'. Presidente di e asociacion di comerciantenan y empresanan di servicionan turistico di Mallorca, ACOTUR, José Tirado, a señala den e articulo cu ofertanan All-inclusive por ta zona un bon entrada na inicio pero tin su efectonan negativo despues. Secretario General di PSM-EN, Biel Barceló ta mustra riba e necesidad pa traha un regulacion pa frena e paketenan All-inclusive, mirando cu e ta genera un turismo di calidad abou y cu no tin adkisicion.
Manera ta conoci Turistanan cu ta scoge pa cumpra paketenan di All-inclusive, ta paga adelanta pa nan acomodacion cu ta inclui cuminda y bebida y den cierto ocasion te hasta entretenimento. Bisando esaki ta obvio cu e turista no tin necesidad di sali for di e propiedad pa explora e destinacion contribuyendo na economia di e pais. Ta bin acerca e hecho cu turistanan di All-inclusive ta probecha di e posibilidad di consumi e cantidad di alcohol desea creando asina tambe tur situacionnan no desea specialmente pa e empleadonan di e hotel.
Na Mallorca a haci un encuesta entre empresanan di cual 68% a considera cu e fenomeno di All-inclusive ta destruyendo e forsa laboral den e sector turistico. Fuera di e condicionnan cu mas stress pa e empleadonan, nan ta keda restringi pa acepta tips.
E articulo di HOSTELTUR ta referi tambe na e hecho cu operadornan di biahe pa nan por gana nan comision ta bende e paketenan aki lo mas tanto posibel y e hecho ta cu e ta crea un mal imagen turistico pa Mallorca.
Aruba a traha duro pa mehoracion di nos producto haciendo inversionnan miyonario den nos infrastructura. Hotelnan tambe a haci nan debido inversion. Tur esaki pa atrae netamente e turista mas afluente, e turista cu por gasta mas y contribui na nos economia.
Asina mes Gobierno di Aruba no kier isola e mercado aki pero mas bien ta kere den un balansa saludabel cu a sa di traha pa e sector turistico di Aruba te cu awor. Un balansa saludabel di accomodacionan cu ta inclui EP, Timeshare, All-inclusive y otro acomodacionnan. Tur opcion pa nos bishitantenan, pero principalmente un balansa cu tin e interes general di nos comunidad. 

Expresionnan haci den e articulo aki no necesariamente ta refleha opinion di ArenaPoliti.co