Otmar Oduber por wordo considera un walking contradiction. No solamente e la ganja muri 2 vez caba, sino tambe e la ganja hiba un periodista corte pero tur su decisionan cu e ta tuma ta contradeci loke e mes ta bisa.
Mientras minister Oduber ta bisa cu su vision ta pa atrae turistanan di calidad y turistnan cu ta gasta hopi placa den nos economia y turistnan cu ta dispuesto pa paga mas cu $300 pa anochi pa camber di hotel , su decisionan y accionan ta contradeci su mesun ‘’supuesto vision’’. E mesun Otmar Oduber aki na mas cu un occasion a bisa cu e ta contra di expansion di mas camber di hotel.
Na anja 2010 fraccion di AVP a presenta y aproba un mocion pa para TUR construccion di mas camber di hotel pasobra no tin espacio mas na Aruba pa mas camber di hotel. Den e mocion a urgi gobierno pa bin cu un moratorium riba construccion di mas camber di hotel y pone un paro na esaki pa e proximo 10 anjanan. Logicamente gobierno no ta duna oido y mucho menos tene cuenta cu e mocion di e fraccion cu ta sostene e gobierno aki. Pa hopi anja partido AVP a papia y a bisa na mas cu un occasion cu nan ta contra di construccion di mas camber di hotel. Nan a protesta contra binimento di e unico hotel di 5 strea na Aruba cu ta Ritz Carlton. Continuamente tawata haci uso di e rapport Sam Cole cu a wordo traha cu yama Carrying Capacity. Den e rapport aki a bai extensamente cuanto camber di hotel mas Aruba por carga y tambe kiko ta e consequencianan di construccion di mas camber di hotel pa nos pais. Diripiente awor cu AVP ta den gobierno nan ta cambia completamente di pensamento. Mescos cu nan a priminti pueblo nan lo elimina BBO, reduci tarifa di coriente from day one cu 25%, elimina pobreza, reduci e costo di bida, baha crimindalidad nan a priminti pueblo cu NO lo bin construction di mas camber di hotel.

Na e momentonan aki Otmar Oduber y Benny Sevinger a bai di acuerdo pa expande e cantidad di cambernan di hotel cu 1250 camber. Ora bo kere ta hotelnan di calidad nan lo trece ta hotelnan di entre 1,2 y 3 strea. E hotelnan cu ta den pipeline y toezegging a wordo duna caba na nan ta mas bien hotelnan cu lo trece turistnan cu NO ta gasta placa. E expansion di cambernan di hotel tambe ta bai linja recta contra pensamento di ATA. E profesionalnan di ATA ta traha sumamente duro pa por atrae turistnan cu ta gasta placa. Envez cu Otmar Oduber ta tene cuenta cu esaki y ta duna nan oido y dialoga cu nan ta haci net contrario. Tur e cambernan addicional di hotelnan cu ta biniendo NO ta carga sosten y aprobacion di ATA. ATA tin diferente ‘’tools’’ cu por yuda gobierno na momento cu kier expande e cantidad di cambernan di hotel. Un di e toolsnan cu por wordo usa ta esun cu por midi e efecto di cierto cadena di hotel riba e REV PAR y riba economia di Aruba. Na ningun momento gobierno ni minister di turismo a aserca ATA pa haci e calculacionan nesesario pa midi e efecto di tur e hotelnan cu ta den pipeline. Ta hopi lamentable cu ATA ta wordo exclui di esaki mirando cu nan por a duna un gran aporte den e seleccion di hotelnan cu ta fit den e vision di atrae turistanan cu ta gasta placa den nos economia. Cu e expansion di cambernman di hotel a lo loco asina por conclui cu Otmar Oduber no tin un maneho, no tin un vision, no tin un plan y mas bien ta tuma decisionan basa riba Amistad y AD HOC envez di decisionan cu ta na bienistar di nos pueblo! E preguntanan principal ta, tin lugar pa mas camber di hotel, kende ta bai traha na e hotelnan aki, ki impacto e tin riba nos fondonan social y medico, ki impacto e tin riba vivienda, ki impacto e tin riba nos infrastrcutura? Ta preguntanan cu gobierno mester contesta! 

Expresionnan haci den e articulo aki no necesariamente ta refleha opinion di ArenaPoliti.co