Prome Minister Mike Eman durante bishita na proyecto andando 

ORANJESTAD – Prome Minister Mike Eman compaña pa Minister di Infrastructura Benny Sevinger e siman aki a bishita dos proyecto importante di Infrastructura cu Gabinete Mike Eman tin den ehecucion. Siman pasa a haci un recorido den e edificio nobo di dr. Horacio Oduber Hospital y a scucha con ehecucion di e proyecto ta bayendo.

Diahuebs mainta Prome Minister Eman y su colega Minister Sevinger, tabata na e proyecto di riolering grandi na altura di edificio di Sun Plaza. E sistema di reiolering aki ta mehora e transporte di awa pa Playa pa Bubali Plas.

“Awe hunto cu Minister Benny Sevinger di Infrastructura nos a bishita proyectonan via cual nos a pone metanan grandi nos dilanti pa locual ta renobacion di pais Aruba. Mi mester bisa cu Minister Sevinger hunto cu InfraTeam, DOW y tur otro cu ta encarga, ta haciendo un trabou hopi grandi pa por realisa e vision di un Aruba renoba,” esaki Prome Minister Mike Eman a bisa na final di e bishita, unda cu el a haya splicacion detaya di tur loke ta wordo haci.

E sistema di tuberia cu ta bin for di Oranjestad tabata pasa banda e hotelnan 'low rise' prome cu e yega Bubali Plas. Sinembargo Ministerio di Infrastructura su departamentonan a haci un diseño unda cu e awa cu ta bini for di diferente area di Oranjestad ta yega na un pos cu ta wordo construi banda di Sun Plaza riba L.G. Smith Boulevard y for di ey, cu ayudo di un pomp grandi, ta wordo manda directamente pa Bubali Plas, aliviando asina e sistema di riolering di e hotelnan 'low rise'. Aki Prome Minister Eman a haya un splicacion con henter e sistema di riolering tabata y con e ta bay funciona den futuro.

E mandatario a keda impresiona y a expresa cu e sistema nobo aki ta yuda aumenta eficiencia y capacidad di e sistema cu nos tin na Aruba. "Un inversion cuantioso pero hopi importante pa upgrade e infrastructura di pais Aruba.”

Expresionnan haci den e articulo aki no necesariamente ta refleha opinion di ArenaPoliti.co