Minister President Mike Eman na inauguracion di Parke Brenchi na Wilhelminastraat. 

Famia por a desaroya e tereno aki comercialmente, pero a scoge pa crea un parke publico contribuyendo asina na revitalisacion di centro di Oranjestad

ORANJESTAD – Principio di e siman aki, a inaugura area publico den centro di Oranjestad, riba Wilhelminastraat, den presencia di un grandi cantidad di famia, amigo, conosi y bisiñanan di famia di Arends. E parke, dedica na ‘Bruno Justiniano Arends’, miho conoci como Brenchi, a devela tambe un busto na su honor. Brenchi tabata un comerciante exitoso cu entre otro tabata tin varios negoshi den e area caminda cu e parke na su honor ta situa. Varios di e edificio cu tabata di Brenchi awendia ta wordo renoba of restora. Academy of Fine Arts and Design (AFAD), di Rietveld Academy, tabata e edificio na unda tabata tin ‘Brenchi’s Hardware Store’ y ta un bibo ehempel di e esfuersonan di famia di brenchi pa aporta na revitalisacion di centro di Oranjestad. Net di AFAD e parke na honor di Brenchi tambe ta riba unda antes tabata tin un negoshi di Brenchi.

Milton Harms, na nomber di famia di Brenchi, a gradici amigo y bisiñanan pa nan presencia. “E parke su intencion ta, pa ta un luga publico, pa ta tur hende por uze den centro di ciudad. Mi kier a gradici gobierno di Aruba pa tuma e iniciativa pa drecha Playa y nos a contribui cu nos parti.” Sr. Harms a sigui gradici tambe un y tur cu a yuda den realisa e proyecto di converti e tereno den un parke dedica na na welo.

Sra. Irais Sankatsing, a lesa un segmento di un buki dedica na Brenchi Arends. “Un cas yena cu storia di fiesta y alegria, di tragedia y perseverancia, di abundancia y amistad. Storia cu ta forma parti di e monumento aki y cu ta bira e motibo pa e bunita homenahe cu nos ta presenta. Un homenahe di e spirito di comercio, sentido comunitario y forsa Arubano cu a sa di cana cu perseverancia bou di tur circunstancia y cu a crea siglo tras siglo un bienestar poco bisto den nos region.” Siguientemente, e yiunan di Brenchi a devela su busto cu tin un bunita luga den e parke riba Wilhelminastraat.

Famia di Brenchi a invita Prome Minister Mike Eman hiba palabra na e ocasion importante aki. El a cuminsa pa splica cu Brenchi y su famia, tabata tin un dedicacion enorme, cu a duna un empuhe grandi na comercio na Aruba, comercio den Playa, pero mas importante ainda a combina esaki cu un sentido di compromiso cu nan pais. Sr. Eman a referi aki na e hecho cu e famia, por a scoge pa desaroya e tereno di hopi balor comercial den centro di Oranjestad, pero finalmente a scoge pa crea un area publico, accesibel pa un y tur. “No por tabata tin un miho forma pa duna honor, respet y reconocemento na e forma di haci comercio aki, un forma di avansa e economia di e empresa y e famia, pero na e mesun momento avansa e bienestar general di nos pais cu e ehempel cu Milton Harms y famia a duna door di tuma un propiedad cu tanto balor, pasobra nos tur conoce e balor di propiedadnan den centro di ciudad. Pa bo tin e bondad, e curazon pa tuma un propiedad asina y no desaroye den un ‘real estate’ cu ta bay tin hopi rendimento financiero pa e inversionista y famia, pero pa dedik’e na un tributo na prome luga na Brenchi Arends y famia, y dun’e tambe un espacio publico pa nos pueblo. Ta un sentido di compromiso cu Aruba, un curason hopi, hopi grandi pa cual mi kier a gradici Milton Harms, Roy Harms, henter e famia, cu a pone e aspecto aki, di contribucion na pais Aruba asina central. Hopi, hopi danki y un fuerte aplauso tambe pa e gesto grandi aki.”

Sr. Eman a sigui splica cu gobierno ta aprecia e tipo di iniciativanan aki na beneficio di bienestar general. “Algun aña pasa nos a cuminsa cu e lucha grandi pa nos por rebiba nos centro di ciudad. Hopi caya y edificionan deteriora y cu empeño grandi nos a cuminsa e renobacion di centro di ciudad. Gobierno por haci su parti, pero hopi edificio ta den man di sector particular. Ta hopi importante tambe pa sector priva tuma su responsabilidad y tambe contribui. Y e ehempel cu ta wordo duna na e momentonan aki, cu e propiedad aki, cu e edificio bunita di Brenchi, cu a wordo restaura, ta un bunita ehempel, un bunita motivacion, pa nos tur tambe por continua den e direccion aki. Un gradicimento tambe pa e iniciativa aki cu ta contribui na renobacion di nos Centro di Ciudad.”

Minister Eman a mustra riba e hecho cu e ehempel aki ta algo cu ta bon pa otro comerciantenan tuma di famia di Brenchi Arends. El a menciona cu tin algun comerciante cu ta trahando riba esaki caba. Un ehempel ta sr. Serge Mansur cu riba propio forsa tambe ta renobando edificionan den centro di ciudad. Di parti di gobierno, sr. Eman a duna ehempel di Renobacion Aruba NV, cu ta un compania den cua hunto cu partnernan comercial, gobierno ta bay cumpra y drecha edificionan di balor monumental, historico of cultural.

“No por tin un Pais sin un centro di ciudad y no por tin un centro di ciudad, sin e nucleonan rond di e caya principal di un centro di ciudad.” Esey ta e curason di un centro di ciudad y awe nos a añadi un poco mas forsa atrobe na e curason aki di centro di ciudad, Oranjestad. Masha danki na tur cu ta coopera cu esey.”

Expresionnan haci den e articulo aki no necesariamente ta refleha opinion di ArenaPoliti.co