Estudio di Banco Central ta confirma ponencia di PDR cu e ley actual tin su risiconan y cu eigenlijk un ley di competencia ta mas indica. 

Di un presentacion di Banco Central den Parlamento riba diaranson atardi a sali na cla cu e mercado di hotel all-inclusive no tin impacto economico negativo riba e economia di Aruba. Tambe a resulta cu no ta berdad cu e turistanan di hotelnan all inclusive no ta sali for di hotel gasta den sectornan eyfo. Den comparashon, un turista all-inclusive ta gasta solamente 48 florin menos cu un turista normal! Mas alew e percepcion cu hotelnan all-inclusive lo ta tene hopi placa afo di e economia local (“leackage”) no ta cuadra cu realidad. Dus tur e motibonan principal pa cual Gobierno kier introduci e ley di all-inclusive no ta existi!
Mas alew Banco Central a mustra den su presentacion cu si kier bay regula e mercado di turismo, e ora a base di recomendacion di OECD y World Bank eigenlijk lo ta miho pa opta pa introduci ley di competencia (“Anti-trust law”) cu ta controla via un órgano independiente, algo cu PDR a bin ta mustrando varios siman caba. PDR a yega di mustra cu tin un Mededingingsverordening desde 2013 den Parlamento di cual por ehempel articulo 2.8 lo por wordo usa pa regula entre otro e mercado di all-inclusive via un organo independiente (y no via un Minister cu tin lunas caba den pleito cu e sector y cu no por wordo considera imparcial). Mas alew, for di un estudio legal cu Banco Central a laga haci a resulta cu, mescos cu PDR a constata, por tin risiconan di claimnan legal mara na e concepto di ley di all-inclusive actual. E risico di claimnan ey segun PDR por a deduci por wordo cuantifica na mínimo 60 miyon florin. Fuera di esey a resulta di e estudio cu Banco Central a haci cu tin un risico adicional cu invershonan na un balor di 100 miyon florin lo keda sin wordo haci dor cu e clima di invershon lo wordo afecta mas ainda dor di peso di regulacion (“regulatory burden”). E propio conseho legal cu Banco Central a busca lo ta bisa tambe cu lo ta bon pa haci un estudio economico adicional pa cu cierto aspectonan clave cu e ley actual ta basa su mes riba dje. Banco Central a indica tambe cu ohala lo tabata tin mas tempo pa haci mas estudio. Finalmente Banco Central a recomenda pa en todo caso e ley no drenta na vigor prome cu 3 anja di transisishon e.o. paso den mundo hotelero ta boek pa seasons adelanta. Tumando tur lo menciona na cuenta, además e hecho cu AHATA no por haya su mes den e concepto di ley y tambe cu Aruba Gastronomic Association recientemente a pidi pa un cooling off period, PDR ta haya cu ta miho pa Gobierno retracta e ley di all-inclusive! Gobierno no mester bay experimenta cu e unico pilar económico cu a resta nos pais te awo, vooral awo cu ta resulta cu no tin motibo.

Expresionnan haci den e articulo aki no necesariamente ta refleha opinion di ArenaPoliti.co