Minister Otmar Oduber: Importante ta pa nos para banda di interes general di Aruba
Diabierna awo lo trata ley di All Inclusive den parlamento.
ORANJESTAD ( AAN) Despues di un cooling off period di cuatro luna y cu rapport di banco central riba all inclusive ta cla lo trata e ley di All Inclusive den parlamento. E SWOT analisis di e raport di Banco Central pa cu all inclusive ta pa un 95% den liña cu esun di PWC cu a wordo entrega na Parlamento, Minister di Turismo Otmar Oduber a anjadi. Sinembargo e raport di Banco Central a wordo traha riba peticion di e fraccionnan di AVP y MEP den parlamento. Minister Otmar Oduber a splica cu e raport ta trata e ley di all inclusive y e impacto di e industria riba economia di Aruba. E entrega di e raport a bay compaña pa un presentacion di casi cuater ora, unda cu Banco Central a trece dilanti un analisis di e Strengths, Weaknesses, Opportunities y Threats (puntonan fuerte, y oportunidad y menasanan/risiconan) di e segment all inclusive na Aruba, combina cu cifranan local. Den esaki por mira claramente cu e impacto pa dia di e bishitante all inclusive riba economia di e isla ta hopi menos cu e impacto pa dia di un bishitante cu ta kedando den un camber EP, Oduber a subraya. Minister Otmar Oduber a agrega cu Aruba Tourism Authority (ATA) a traha un raport, a haci diferente benchmark, PWC a traha un raport, y awo cu e raport di Centrale Bank por wak cu e contenido di e documentonan ta riba e mesun liña. Un raport di World Tourism Organization (WTO) tambe ta menciona factornan comun. Minister Otmar Oduber ta gradici Banco Central pa traha e raport den un tempo asina cortico, unda cu nan a logra crea diferente benchmark (comparacion) pa midi e contesta cu diferente raport caba a duna pa cu nan conclusionnan. Loke Centrale Bank a haci ta “plug in”, esta yena, e cifranan, y midi e impacto di diferente efecto cu e industria tin riba economia di Aruba. Awor no mester tin discusion mas riba e punto cu e impacto di e bishitante all inclusive ta menos riba nos economia, awo tin e cifranan riba mesa, actualiza pa Aruba. E intencion ta pa Centrale Bank presenta e raport na parlamento, y haci e raport oficial y publico prome cu e reunion di diabierna. Awor e oportunidad tey pa cada miembronan di Parlamento pone e raportnan banda di otro y lo mira cu nan ta practicamente identico. Minister Otmar Oduber ta satisfecho mirando e diferente raportnan cu a keda haci y ta sinti satisfecho pa e decision cu a tuma pa bin cu e legislacion pa regula all inclusive na Aruba.
Expresionnan haci den e articulo aki no necesariamente ta refleha opinion di ArenaPoliti.co