Promer Ministro Mike Eman durante e di 7 Cumbre di e Asosiasion di Estadonan di Caribe 

Oranjestad / Havana - Dianan 2, 3 y 4 di juni ultimo a tuma lugar e di 7 reunion di Hefe di Estado y di Gobierno, miembronan di ACS (Association of Caribbean States) selebra na Havana Cuba. E cumbre aki a concentra riba e tema di con e paisnan den Caribe y esnan cu frontera cu lama Caribe por atende cu e retonan di desaroyo sostenibel, cambio climatico y paz den nos region. 

Prome Minister Mike Eman di Aruba tabata presente na Havana, Cuba como parti di delegacion di Reino Hulandes, cu incluyendo Prome Minister Mark Rutte pa Hulanda y islanan BES, Prome Minister di Corsou Bernard Whiteman y Prome Minister di Sint Maarten William Marlin. 

Durante tres dia lidernan di gobierno y expertonan di paisnan Caribense a debati riba temanan cu ta afecta henter e area di Caribe, entre nan circunstancianan cu ta impedi un desaroyo harmonioso y sostenibel. E reunion di hefenan di estado y gobierno a wordo presidi pa e Secretario General saliente Ambassador Alfonso Múnera Cavadía di e Republica di Colombia. Riba e ultimo dia e Presidente di Cuba, Raul Castro Ruz a habri y guia e reunion di clausura. E reunion a conta cu participacion di e 24 estadonan miembro, 8 pais miembro asocia, un total di 24 miembronan cu e status di observador, mas un cantidad di organisacionnan regional e internacional. E 4 paisnan di Reino Hulandes, Hulanda (BES), Aruba, Corsou y Sint Maarten pa prome biaha a participa hunto na un evento di ACS.

Minister Mike Eman den su discurso a elabora riba e tema di desaroyo sostenibel, su retonan y e necesidad pa estrecha lasonan di cooperacion den nos region. El a bisa cu ningun di nos paisnan ta posee e formula ideal pa atende cu e retonan cu ta afecta nos region, p'esey mes ta imperativo pa identifica y intercambia e "best practice" nan cu ta existi den cada pais di Caribe. E meta primordial mester ta pa busca y establece un nivel di prosperidad economico cu na su bes mester wordo traduci den e bienestar di nos ciudadanonan. Nos mester ta constantemente ocupa cu e buskeda di e modelo ideal cu por yuda nos atende na un forma eficaz y sostenibel cu e desafionan actual. Den un forma habri y determina el a extende un invitacion na e comunidad di nacionnan Caribense pa hunto explora e vianan pa logra un miho bida pa nos pueblonan. Esey solamente lo ta posibel den e espirito di compromiso, amistad y solidaridad. Aruba ta para dispuesto pa comparti su experiencianan cu nos paisnan ruman den Caribe.

Expresionnan haci den e articulo aki no necesariamente ta refleha opinion di ArenaPoliti.co