Cu e costo di bida a subi ultimo añanan barbaro, esey tur hende sa menos e politiconan tradicional cu nan sostenedonan. Awendia hopi persona, incluso comerciantenan Chines, ta bay cumpra cerca e negoshi banda di aeropuerto pa saca un tiki mas di nan florin. Pero asina mes, e ta keda dificil pa sobrevivi manera tur dia costo di bida ta subi, pero pueblo ta keto.

Normalmente ora un hende mishi cu cartera di otro, e ultimo ta bira brabo y e ta sali defende su cartera. Gobierno ta plunder den anochi y den dia cla, laga e cartera plan bashi, pero pueblo ta keda keto.

Pueblo tin cu warda 100 aña pa haya un cas social of un pida tereno, mientras tur hende por bin Aruba y haya un cas social of un pida tereno prome cu pueblo, pero pueblo ta keda keto.

Trankilidad den barionan no ta wordo respeta mas. Sushedad tur caminda. Oranan di descanso no ta wordo respeta mas y polis mes no ta bin mas pa para e abuso social, pero pueblo ta keto.

Diferente departamento cu mester sirbi e interes di e pueblo, awendia ta coopera pa legalisa actonan contra ley, duna tur sorto di permiso despues pa tapa bagamunderia pasobra un minister a duna un ‘krabbeltje akkoord’, husticia awor si a bira ciego, pero pueblo ta keda keto.

A introduci un BAZV pa cubri e gastonan astronomico di AZV, pero ainda e gastonan di AZV ta sigui subi keto bay. Ora bo persona bira malo y mester di e cuido cu ta pagando pe, bo no por hay’e. Pero otronan si cu no ta contribui manera abo, si ta haya, pero pueblo ta keda keto.

Pueblo a wordo gaña cu e tram den caya grandi tabata e salbacion y e vision pa caya grandi. Cu e inversion aki, otro inversionistanan lo a inverti. Mientrastanto nada di vision, comercio den caya grandi tambe a muri y awor gobierno ta puntra pa comprension, pero pueblo ta keto.

Biahamento rond mundo manera un ‘celebrity’ tur luna. Show p’aki, show p’aya. Salbador di mundo, pero aki na Aruba ningun milagro economico pa mira. Miseria so. Pero asina mes mas biyones ta wordo hinca den proyectonan dudoso. Campaña atrobe ta wordo hiba uzando placa di pueblo, pero pueblo ta keda keto.

Cada dia mas y mas hende ta sinti cu Aruba ta bayendo atras. Cada dia mas y mas hende ta sinti cu nan ta birando un ciudadano di tercer clase den nan mesun pais, pero pueblo ta keda keto.

Prijs mundial di petroleo pa hopi tempo caba ta hopi abou. Gobierno a ‘YUK’ pueblo un 300 miyon cu e ‘WEB-hedging’. Molina di biento cu mester a baha e prijs di electricidad no a contribui na esaki. Y asina mes, gobierno kier bin cu un otro parke, pero pueblo ta keto.

Gobierno kier regala awor e patrimonio mineral di Aruba na otronan bendiendo pueblo e argumento emocional di un reapertura di un refineria ‘Green’. Locual e ‘reapertura’ lo costa pueblo y pa cual tur fraccion den parlamento a duna gobierno un cheque blanco, Aruba por construi un refineria nobo, moderno y duradero, pero pueblo ta keda keto. Ay pueblo, kico a pasa cu bo orguyo, dignidad y inteligencia? Ay pueblo, cuanto abuso mas bo kier of por wanta?

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co