E ultimo reunion di e Interparlementair koninkrijksoverleg (IPKO), a cuminsa hopi malo pa e delegacion di Aruba cu e halamento di mokete den parlamento. Un incidente hopi lamentabel cu a pone e cara di Aruba na berguensa y cual e partido na mando kier hinca den e ‘doofpot’. Pero asina mes e presidente a biaha pa Hulanda, despues di su ‘encuentro’ cu e gran lider. Pues enbes di wordo sanciona, locual a pasa pendiente un retiro si e tabata ‘Buchi of Shimaria’, aki nada a pasa. E vice-presidente cu a keda ‘boosjes’ na cas, pasobra su hefe a dicidi cu e mes ta bay Hulanda, por ‘smile’ atrobe. Su fraccion a logra cu no solamente e por ‘haal in’ e biahe perdi aki, pero awor e por biaha hopi mas pa Hulanda, Corsou, Bonaire y St. Maarten siendo e ‘trekker’ di e ‘nieuwe werkgroep klimaatverandering en energie’ (Afsprakenlijst IPKO mei-juni 2016). Pues e declaracion di e lider di fraccion di AVP pa ‘Lopez-Tromp y Dammers mester evalua y saca nan conclusion’ (NoticiaCla, 27 Mei 2016), tabata pa puro consumo politico local. Enbes di sancion y duna ehempel, tur cos a sigui manera nada a pasa y hasta e vice-presidente a wordo recompensa. Pues, ‘crimes pays’. Ki berguensa!

Pero e berguensa no a caba eynan. Desde aña pasa, nos di partido ABO ta bisa publicamente pa gobierno duna claridad riba e recursonan mineral rond di Aruba y cu ningun contract cu CITGO of cualkier otro compania of instancia mag wordo firma, sin cu consulta cu pueblo prome. Un gobierno cu a pone Aruba na rudia di tur otro nacionalidad y cu ta capaz di bende nan propio famia pa placa y ‘fama’, no ta di confia. Un gobierno asina, hunto cu su parlamento ‘Sancho Panza’ no por regala un otro patrimonio di pueblo na otronan, mientras cu e ta sigui castiga pueblo cu medida y debe. Na varios ocasion partido ABO a bisa cu tin indicacion cu ta mustra cu Aruba tin recursonan mineral. Pero te awe, gobierno no kier divulga nada. Y enbes cu e representantenan di pueblo haci nan trabou, nan tur ta prefera di keda na soño, tira un ‘schijnbeweging’ politico cu nan tin interes di pueblo SI na pecho, mientras cu nan ta felicita gobierno cu un ‘Agreement’ pa sigui negocia pa un ‘Final CITGO-deal Agreement’ sin cu un dia parlamento a mira un documento. Tur fraccion den parlamento a duna gobierno cu e ultimo postura aki di 13 mei 2016, un cheque blanco. Ora nan a ripara cu partido ABO a demascara nan, diripiente nan a core bay gaña pueblo cu nan tin e poder pa cambia cualkier acuerdo firma caba pa gobierno. Esey nunca a pasa y esey tampoco lo pasa!

Riba 31 Mei 2016, durante e IPKO, e delegacion consistiendo di 10 persona, a scucha durante un presentacion di ‘het ministerie van EZ over exclusieve economische zones en ruimte voor vragen’, cu ARUBA TIN RECURSONAN MINERAL (Declaracion di mr. Adi Thijsen, Bo Guia, 31 Mei 2016). Awor straño cu Hulanda sa cu Aruba tin recursonan mineral y te na Hulanda, nos parlamentarionan mester a tende esaki. Tambe ta hopi straño cu nos parlamentarionan a haya e confirmacion cu Aruba tin recursonan mineral, pero toch tur a scoge pa keda ‘muisstil’ of bin conta storianan menos importante di IPKO na pueblo. Mas straño ainda ta e silencio di e miembro cu ‘ta lucha incansabel pa e reapertura’, cu tambe tabata na Hulanda. E postura aki, ta pone pueblo haci e pregunta, ken su interes realmente nos parlamentarionan ta sirbi. E ta esun di Aruba, esun di otro nacionalidadnan of nan propio interes? Porta kisas cu nan silencio total tin algo di haci cu nan tambe kier bira miyonario, manera algun di nan colega a bira caba? Tristo pa mira cu pueblo a paga hopi placa pa nan bay Hulanda pa haya e confirmacion valioso aki, pero cu nan a scoge pa no informa pueblo di dje. Ta parce manera cu nan tambe ta gusta wak pueblo wordo suta cu medida, manera gobierno. Ki berguensa!

Algo ta hopi fout ora miembronan di un cas no sa mes kico ta pasando den nan mesun cas. Algo ta hopi fout ora e bisiña sa kico ta pasando den bo cas, y abo no. Algo ta hopi fout ora despues cu bo a tende kico ta pasando den bo cas y ainda bo no a puntra e bisiña kico ta su rol den esaki. Dicon ningun parlamentario a puntra Hulanda kico ta su rol den e cuenta di e patrimonio mineral di Aruba? Dicon ningun parlamentario a puntra Hulanda dicon nunca e a comparti e informacion valioso aki cu nan? Dicon ningun parlamentario a puntra Hulanda si e patrimonio mineral a wordo reparti caba, door di ken, ken tur a haya un pidi y kico a resta pa e pueblo Arubano? Esaki ta e calidad di nos parlamento. Ki berguensa!

Nan a ‘YUK’ pueblo 300 miyon cu e ‘WEB-hedging’. Biyones na ‘klinkers’, hospital y e camindanan ‘Scur’. Y si esaki no tabata suficiente, awor e mesun politiconan tradicional cu a pone Aruba na rudia di tur otro nacionalidadnan, ta haci tur cos posibel pa sconde e informacion cu Aruba tin recursonan mineral. Recursonan cu por soluciona nos problemanan financiero y social cu nan mes a causa cu nan proyectonan di locura. Recursonan cu ta di pueblo y su futuro generacionnan, e politiconan tradicional kier haci manera e ta di nan. Cada dia e ta bira mas y mas dificil pa no kere cu intencionalmente e politiconan tradicional kier haci e pueblo aki mas dom y pedido di limosna pa asina haci e pueblo aki sumiso na otro nacionalidadnan. Shame on you! Ki berguensa!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co