Reunionnan entre Aruba Stevedoring Company (ASTEC), Aruba Ports Authority (APA) y representantenan di gobernacion, esta Ministernan, ta algo cu ta pasa frecuentemente, pero mirando cu ASTEC ta cuminsa cu construccion di e fase, cu ta bay cay bou di nan supervision na Waf di Barcadera, nan a invita Prome Minister Mike Eman y su colgea encarga cu Economia, Comunicacion, Energia y Medio ambiente pa un reunion importante y informativo relaciona cu e ultimo desaroyonan na Barcadera.

Minister ing. Mike de Meza na final di e reunion a bisa di ta hopi contento con e trabounan a bay te cu awo na Barcadera. E presentacion a bay primordialmente riba e fase cu ta cay bou di ASTEC cu ta encarga cu e infrastructura entre e muraya di e waf y caminda cu e barconan ta mara (dok). Contestando e pregunta, cu tin hopi aña ta papiando di e proyecto aki y di con awo e ta birando un realidad, Sr. de Meza enfatisa cu esak tin di haci cu "gobernacion!"

"Nos a pasa for di 2009, 2010, door di e fase di negociacion, yega na un concepto cu tur dos compania, Astec y APA, a sinta na mesa y a yega na un acuerdo riba e futuro di un containerhaven nobo," Minister de Meza a splica. Despues di esey a sigui un fase basta extenso caminda a traha riba un diseño state-of-the-art pa e waf situa na Barcadera. E parti di e proyecto bou di supervision di APA ta den pleno ehecusion y e fase cu ASTEC ta encarga cu ne ta cuminsa. "Mi ta kere cu perseverancia y commitment pa a crea e posibilidad aki, cu ya pa hopi aña cu kier a bin cu un containerhaven nobo, a bira tempo y esaki ta den su ehecusion," de Meza a accentua.

De Meza: "porfin dentro di 1 aña mas o menos nos ta bay cumpli cu un soño di hopi hende na Aruba... Nos a cuminsa cu ne despues di 2009, den e Prome Gabinete di Mike Eman I, awor aki den Gabinete Mike Eman II e ta wordo completa y cu e ta bay den operacion."

"Pa economia di Aruba," Sr. de Meza a sigui splica, "e ta un contribucion grandi, e ta bay alivia e limitacion cu nos tin." E limitacion cu, e Minister encarga cu asuntonan Economico na Aruba, ta referi na dje ta interferencia cu e dos operacionnan tin cu otro na e waf na Playa. E operacionnan di carga y di turismo crucero ta rekeri diferente tipo di infrastructura y sistema di traha. AWo e enfoke di waf di Barcadera por enfoka mas riba eficiencia y ampliacion. E waf na Paardenbaai por enfoke mas riba e turista y e experiencia di producto Aruba cu ta rekeri pa e tipo di industria aki.

E mudamento di e operacion di carga pa Barcadera, "ta crea hopi posibilidad tambe den e desaroyo di maneho  di producto y containernan, asina Aruba por amplia e facilidad, pa Aruba ta un Hub entre continentenan Europeo y Americano."

Expresionnan haci den e articulo aki no necesariamente ta refleha opinion di ArenaPoliti.co