Duranta tratamento di presupuesto 2017 di pais Aruba ta un gran cantidad di mocionan a keda presenta pa fraccionan di MEP, AVP y Democracia Real. Un di e mocionan cu sigur a hala hopi atencion tawata e mocion di siguridad cu a wordo presenta pa fraccion di AVP. Promer cu mi bai den e contenido specifico y cu ki intencionan AVP a presenta e mocion aki lagami pone e dictum di e mocion pa tur hende por lesa esaki y saca nan mesun conlusion. Nos a lesa esaki varios biaha y nos tur como miembronan di fraccion di MEP a yega na e mesun conclusion, cu AVP kier mete den privacidad di nos ciudadanonan y tambe kier dicidi riba fiestanan priva na cas di nos hendenan. E dictum di e mocion presenta pa faccion di AVP ta bisa lo siguente: ‘’ Pa introduci e obligacion pa notifica polis no menos cu 48 ora adelanta di CUALKIER ACTIVIDAD PUBLICO OF PRIVA, incluso e cantidad di hende cu ta spera cu lo atende e actividad’’ E contenido di e mocion ta hopi cla, pa tur actividad publico of PRIVA mester notifica polis. Priva ta Priva, un fiesta na cas di famia ta cai como PRIVA! Si esaki no tawata e caso anto e ora AVP lo mester a splica esaki den e mocion cual nan NO a haci y nan a lague manera cu e ta. Ningun caminda den e mocion ta splica kiko nan kiermen cu PRIVA. PRIVA kiermen un fiesta na cas di famia, un fiesta na un club, un fiesta na beach, tur esakinan ta wordo considera priva cu e mocion aki.

Miembro di fraccion di AVP Desiree De Souza Croes a purba splica e mocion aki y e la bisa cu e ta ‘’ongelukkig geformuleerd’’. Si esaki tawata e caso e ora tawata na su lugar pa fraccion di AVP trek in e mocion aki cual nan no a haci pasobra nan sa masha bon cu ki intencion y pakiko a presenta e mocion aki. No solamente e mocion aki ta invadi nos privacidad y kier controla tur nos ciudadanonan sino tambe e ta un medida pa tur esnan cu kier organiza un fiesta PRIVA pasobra di awor en adelante lo mester bai paga pa esakinan.

Nos pais tin asina tanto problemanan social, problemanan cu criminalidad, problemanan cu pobreza anto AVP ta presenta un mocion pa controla nos hendenan ki dia, ki ora, cu kende y con nan ta haci nan fiestanan priva? Esaki ta bisa hopi di e fraccion aki y ta ilustra e mentalidad di fraccion di AVP y di e gobierno di AVP. Na momento cu e mocion aki a wordo presenta diaranzon anochi nos di fraccion di MEP a keda sorprendi cu e mocion aki y no por kere con lew AVP kier bai pa controla nos ciudadanonan y invadi nan privacidad. Diaranson mainta ora mi a yega parlamento mi a topa cu ex lider di fraccion di AVP Rene Herde y la puntrami kiko ta nos objeccion contra e mocion aki. Mi a splike cu pa nos no ta acceptable cu ora organiza un fiesta priva na cas mester avisa polis 48 ora adelanta. Ningun momento a haci ningun cambio na e mocion aki y a saca e parti cu ta bisa PRIVA for di e mocion aki pasobra ta eynan AVP kier a yega. No tawata tin boluntad pa haci cambio na e mocion aki of trek esaki in. Cu e mocion aki tur hende cu kier organiza algo PRIVA mester avisa polis 48 ora adelanta. Nos pais ta birando manera un ‘’politiestaat’ y esaki ta un forma di dictadura moderno caminda un gobierno kier te hasta dicta awor riba bida priva di hende! Esaki a bai mucho lew caba! 

Expresionnan haci den e articulo aki no necesariamente ta refleha opinion di ArenaPoliti.co