ORANJESTAD – Durante un conferencia di prensa den edificio Dr. Edward Cheung Center for Innovation a tuma luga un conferencia di prensa cu a conta cu presencia di Parlamentario Donny Rasmijn. E tema di e conferencia di prensa tabata lansamento di e campaña pa stop uzo di saconan di plastic na Aruba. Rasmijn, como Parlamentario di Pais Aruba, tabata e motor tras di e proposicion y a presenta e proyecto di ley cu a wordo aproba e aña aki ainda den Parlamento di Aruba. Hunto cu Parlamentario Rasmijn, tabata tin representantenan di Fundacion Green ‘S’ Cool y otro stakeholders.

Segun e ley aproba unanimamente den Parlamento di Aruba, uzo di saconan di plastic ta wordo prohibi entrante prome di januari, 2017. Esaki a wordo logra despues di a sinta na mesa cu diferente stakeholder y a yega na un consenso pa eliminacion di e saconan cu ta dañino pa medio ambiente, pero particularmente Aruba su fauna marino.

E video clip cu a wordo traha pa conscientisa riba e daño cu saconan di plastic ta causa, a wordo traha den cooperacion cu e hobennan profesional di Ministerio di Asuntonan General di Prome Minister Mike Eman, Green ‘S Cool Foundation, cu ta promove sostenibilidad bou di e hobennan, ATA, AHATA, Triple A, y Jairo Oduber, kende a produci e video-clip.

Segun Rasmijn a splica, no solamente ta bay prohibi e saconan traha di e material di plastic pero tambe esnan di plastic biodegradabel, ya cu e ta contene plastic y lo tuma su tempo pa e 'decompone'. “Nos no por sinta warda añanan pa nan 'decompone' pa cual a dicidi di prohibi e saconan traha cu e tipo di material aki tambe,” Parlamentario Rasmijn a splica. Na mesun momento, mirando e importancia di e tema aki, el a gradici tur e stakeholdernan cu a participa den produccion di e aviso aki, unda cu muchanan ta papia di e peliger di saconan di plastic pa nos flora y fauna.

E campaña aki a wordo lansa den cuadro di e hecho cu entrante prome di januari, 2017, e uzo di saconan di plastic ta wordo prohibi. Pesey ta necesario pa e pueblo traha hunto pa conscientisa ciudadanonan pa no uza mas e rond di 30 miyon saco di plastic cu ta wordo uza anualmente na Aruba so.

“Cada un persona riba e pais aki cu ta carga e pais y medio ambiente na pecho, ban traha hunto pa no solamente reduci e cantidad di 30 miyon of yega na cero uzo di saco di sushi,” Rasmijn a enfatisa. El a agrega tambe cu entrante januari 2017, ta prohibi pa negoshinan duna clientenan saco di plastic. Prome cu e ley drenta na vigor, por mira cu ya caba tin hopi ciudadano consciente ta uza nan mesun tas y negoshinan a cuminsa uza substituto cu no ta dañino pa nos medio ambiente. Polis lo ta encarga pa controla cu cumplimento di e ley aki hunto cu 'City Inspector' y Polisnan extraordinario. Pa no cumplimento cu e ley aki lo tin 10 categoria di boet cu ta varia den intensidad. E ley aki ta conta pa tur tipo di negoshi aki na Aruba.

Juliette Carvahal di Departamento di Innovacion di Ministerio di Asuntonan General, a splica cu e campaña ta mas cu pensa con pa tira sushi afo y transporta loke bo ta cumpra den negoshinan. Den cuadro di esaki, hunto cu AHATA a traha riba e uzo di un saco re-uzabel cu a bestel caba y lo disponibel na entrante januari 2017. Esaki ta un forma cu AHATA kier promove e uzo di saco re-uzabel bou di su miembronan y trahadonan di hotel.

Expresionnan haci den e articulo aki no necesariamente ta refleha opinion di ArenaPoliti.co