Sigurando cu lo tin continuacion y intensificacion di esfuerzonan   
A bishita damnan hunto cu Santa Rosa   

ORANJESTAD – Un dia despues di a atende cu e retonan cu e yobida fuerte a trece pa nos isla, Minister Mike Eman, awor encarga cu Sector Primario, a bishita algun di e damnan rond pa conoce e situacion y con esaki ta bay beneficia cunukeronan Arubiano. Hunto cu directiva di Departamento di Agricultura, Cria y Bestia Santa Rosa, lidera pa Nathalie Maduro, a cuminsa traha di biaha. Premier Eman a yama Serlimar cu e peticion pa haci un accion di limpieza rond di e damnan pa evita cu e awa cu a caba di ricibi di naturalesa, por contamina.

Tambe a papia riba e futuro compra di truck di awa cu ta sumamente necesario pa e cunukero y criadornan di bestia por haya nan su ministro. Te hasta a papia di crea mas dam rond di Aruba pa capta awa y crea reservanan, na luga di inverti den infrastructura costoso cu ta dirigi esaki pa lama. “Nos ta bay traha duro pa tin no solamente e organisacion di Santa Rosa ‘op en top’, pero tambe tur e parti di ekipo pa sostene e trabou grandi cu nan ta haciendo.” asina Prome Minister Eman a declara.

E mandatario ta wak su responsabilidad nobo cu hopi seriedad paso ta compronde e importancia cultural, pero tambe practico. Minister Eman a papia di con e Sector Primario y otro terenonan bou di su liderazgo por ta relaciona cu otro. Refiriendo na agricultura y cria di bestia, a menciona cu ta nos orguyo paso e ta algo cu ta parti di nos identidad como Arubiano. Adicionalmente a menciona cu “asina nos por duna un contenido y dimension adicional na e meta pa Aruba bira mas sostenibel tambe den e produccion di nos mesun cuminda.”

El a manifesta su compromiso cu e departamento, trahador y miembronan di e sector bisando cu por conta riba un apoyo grandi. “Awo nos sa cu nos tin e bendicion di nos creador tambe pa bay haci e trabou aki cu atencion grandi; e apoyo di naturalesa pa por cumpli cu tur esnan cu a demostra cu hasta den secura nunca a falta speranza pa por yega na un dia ta exitoso den e tereno primario.”

Expresionnan haci den e articulo aki no necesariamente ta refleha opinion di ArenaPoliti.co