ORANJESTAD – Den conferencia di prensa di Partido MEP, sra Evelyn Wever-Croes a elabora riba e medida cu gobierno a tuma pa corta gastonan di AZV. Sra Croes ta bisa lo siguiente:

"Den ultimo dianan den nos campañanan den bario, hopi hende ta expresa nan malcontento cu gobierno a tuma medida riba e compensacion di $20 ora un hende biaha pa exterior.
Nos tur sa cu mester corta den gastonan di AZV. Tin hopi "vet" den e contratonan diki diki entre esnan mas halto denAZV.
Tin "vet" pa corta den e contactonan cu esnan cu ta tene nos pacientnan inecesariamente den exterior, maske tratamento a caba, of prome cu e tratamento cuminsa. Mi ta sigur cu esey ta costa mucho mas cu e $20.
Pero nada ta wordo haci riba e tereno aki.
Mi tin comprension cu si tin abuso, pero atende cu e abuso y mester gara e toro na su cacho.
Pero no ta husto pa castiga tur hende pa un of algun caso di abuso. Esey no ta soluciona e problema, e ta haci e problema mas grave.
Pesey mi ta spera cu Gobierno reconsidera. Hala faha mara, bin cu mas medida di control pero no castiga hendenan inocente, cu ta malo y mester haci sacrificio grandi pa bay den exterior pa busca nan salud”, sra Evelyn Wever-Croes ta conclui.

Expresionnan haci den e articulo aki no necesariamente ta refleha opinion di ArenaPoliti.co