Pueblo di Aruba, e forma con criminalidad a introduci su mes ultimo tempo na Aruba, y con progresivamente e ta desaroyando, ta bisa bo cu mester tin factornan cu ta haci esaki lucrativo. Sacando cuenta di e posibel factornan, bo ta encontra bo mes cu varios punto di preocupacion. E prome factor ta cu esnan culpabel pa dicho echonan, mayoría ta procedente di paisnan bisiña. Esaki no ta algo cu ta custumber na nos país. Na di dos lugar, nos sistema hudicial tambe ta laga hopi di desea. E parti di castigo penal contra delitonan, ta masha suave mes. Pa no bisa mes, algo di haci cherche di dje door di dicho delincuentenan.  Castigonan ta demasiado abao, trato demasiado bon na KIA, leynan demasiado amicabel y un Procurador General cu ta trata nan cu handschoen di felpa den corte. Como cherry riba e bolo di criminalidad, e huesnan (cu ta na tino) tambe ta dicta manera ta un glas di vitrina e malhechor a kibra di e joyería na lugar di a horta miles di florin anto cu arma di candela tambe.

Algun pregunta di curiosidad? Dicon na Arabia Saudita no tin ladronicia ni criminalidad di un manera desproporcional asina? Dicon na Trinidad & Tobago nan a sali for di UN human rights council? Dicho paisnan a logra frena cierto criminalidad den formanan hopi radical. Atrobe ta e resultado ta conta.
Aki na Aruba lamentablemente pa cuminsa nos tin un minister cu no ta interesa en lo absoluto kico ta pasando relaciona cu criminalidad. Dicon? Pasobra te cu awe, ningun plan di accion a wordo compila y poni den practica, unda cual e pueblo por cuminsa sinti su mes un poco mas sigur. Tur presion ta wordo poni riba Polis y otro instancianan, pero e coordinacion di e minister mes no tey. No solamente e minister di husticia, sino tambe full Gabinete Eman 2 no ta worry. No tin un plataforma nacional, cu mester consisti di Polis, Aduana, Inmigracion, Warda nos Costa, RST, Veiligheidsdienst y tur otro cu mester ta den. Esaki lo mester funciona conhuntamente cu e Ministerio di Husticia y PG. Tur informacion di accion pa seguridad ta wordo comparti y ehecuta entre dicho departamentonan. Hunto nos ta logra toch?

No mester descarta e rapidez cu Parlamento di Aruba tambe tin cu move cu ne, como esnan responsabel pa e leynan di proteccion na fabor di e pueblo di Aruba. Ta prueba caba cu Parlamento (fraccion di AVP) por haya otro den 6 minuut y tambe den un dia di trabao, si nan kier. Pues, trabao tin. Parlamentarionan, sali na vanguardia di esnan cu a confía boso cu nan voto di confiansa, pa cual como parlamentario, boso tin e responsabilidad tambe di cumpli cu e pueblo. 

Expresionnan haci den e articulo aki no necesariamente ta refleha opinion di ArenaPoliti.co