Prome Minister hopi entusiasma despues di bishita cunucu cu produci grand parti di produccion loca di Cilantro   

ORANJESTAD – “Pa nos ta un gran honor di por bishita cunucu di un persona cu a tuma e iniciativa pa planta na Aruba. Principalmente pa motibo cu planta na Aruba no ta facil, pasobra tin escasez di awa pa plantacion y tin hopi solo. Hopi hende ta pensa cu ta demasiado complica pa sembra productonan na Aruba,” Prome Minister Mike Eman a splica despues di un bishita na Cunucu Pachamama, situa na Soledad.

Fin di siman ultimo Minister Eman a wordo compaña pa directora di Santa Rosa Natalie Maduro, den un recorido di algun cunucu di Aruba. Un di nan cu a wordo bishita ta di sr. Willman Aristizabal na Soledad, cu su producto principal ta Cilantro. Banda di esaki tambe a cuminsa cu cultivo di lechuga, ciboyin y ciboyo largo. “Sr. Aristizabal, apesar di e clima di Aruba y cu ta un artista en realidad a tuma e reto. E ta un persona cu ta mas Arubiano cu Colombiano, kende a dicidi di pone den practica e profesion di agricultor, cu ta algo cu ta existi den su famia caba. El a dicidi di cambia di profesion y awor ta e productor mas grandi di Cilantro di Aruba,” Prome Minister a bisa despues di e bishita y informacion ricibi di e trabou cu ta wordo haci na Pachamama.

Datonan interesante ta cu Aruba ta consumi rond di 10.000 liber di Cilantro pa luna, y 2500 liber ta wordo produci na Pachamama. Mirando cu di e producto aki mas o menos 25% ta wordo produci localmente e mandatario a bisa “nos ta sinti nos mes hopi orguyoso y hopi anima. E cifra aki por ta un indicacion cu nos por haci mas (den produccion) di loke ta tumando luga awo y cu otro productonan pa baha e casi 99% di alimentonan cu nos ta importa,” Eman a splica.

Sr. Eman a enfatisa su vision ta pa Aruba ta 100% sostenibel riba tereno energetico. Pero awor cu e ta encarga cu Sector Primario, e ta haya fascinante loke ta tumando luga y e kier pusha pa Aruba ta sostenibel riba tur tereno.

Pa loke ta e trabou cu ta wordo haci na Pachamama, Eman a bisa “mi ta felicita sr. Aristizabal y su empleadonan, ya cu loke boso ta haci ta un gran inspiracion, ta mustra cu nos por planta y produci pa logra un porcentahe mas grandi di autosuficiencia den produccion di nos cumindanan. Bo ehempel por inspira otronan pa tuma e iniciativa pa cuminsa cultiva diferente tipo di producto”.

Expresionnan haci den e articulo aki no necesariamente ta refleha opinion di ArenaPoliti.co