Glenbert Croes (MEP): Na Aruba tin tur e trahadornan cu e refineria mester y capaz pa haci tur e trabaonan di rehabilitacion y operacion
Den un tono bastante firme, Parlamentario Glenbert Croes atrobe ta manda un mensahe cla na CITGO y Gobierno. Tur e trahadornan local ta capaz y disponibel pa traha den e refineria inmediatamente. Sr Croes ta bisa lo siguiente:
“Nos kier na defensa di tur e trahadornan local y contratistanan local manda un mensahe contundente pa Gabinete Mike Eman 2 y CITGO: Na Aruba tin tur e trahadornan cu e refineria mester y capaz pa haci tur e trabaonan di rehabilitacion y operacion di e refineria.
Hunto cu e felicitacion cu nos a manda pa tur e contratistanan local cu a drenta e refineria y nan trahadornan, nos kier pa Gabinete Mike Eman 2 y CITGO sa cu nos ta debidamente na haltura di e privilegio cu CITGO ta dunando un contratista particular cu ta diki-diki ligá na Gabinete Mike Eman.
No solamente CITGO ta privilegia e compania aki cu e cantidad di trahadornan cu ta drenta via e compania aki ligá na AVP traha pa CITGO pero alavez nos fuente a confirma na nos cu e “rate” cu CITGO ta paga e compania encuestion aki ta hopi mas hopi cu loke cu CITGO ta paga tur e otro contratistanan.
Nos kier pa CITGO sa cu una vez e Gobierno nobo di MEP sinta despues di e victoria electoral di Pueblo cu e victoria di MEP september proximo, nos lo elimina tur privilegio cu CITGO ta dunando e compania aki. Tur trahador local y tur contratista local mester haya un oportunidad husto pa traha den e refineria.
Alavez nos a tuma nota di e noticia di tur e trahadornan cu ta biniendo di afo. Nos a wordo informa tambe di un alianza scondi entre PDV, Casa y un Ministro di Aruba pa trece trahadornan di afor pa e proyecto di MANCAMP mientras cu pa realisa e proyecto aki tin tur e expertisio y mano de obra na Aruba mes.
Den un forma contundente nos kier notifica Gabinete Mike Eman y CITGO: Na Aruba tin tur e trahadornan cu boso mester pa rehabilita e refineria. Traha riba e mancamp y tur otro proyecto por lo cual duna nan preferencia awor.
Alavez nos no mester niun compania di exterior pa certifica nos trahadornan. Tur e trahadornan local ta capaz y disponibel pa traha den e refineria inmediatamente.
Partido MEP ta exigi pa cuminsa contrata trahadornan local paso ora e gobierno nobo di MEP sinta e politica nobo lo ta preferencia total pa trahadornan local y contratistanan local pa tur trabao.
Unda no tin e specialidad na Aruba por trece e experticio aki di afo. CITGO recapacita awor y coregi su politicia corporativo pasobra september lo tin un gobierno di nobo di pueblo cu lo coregi e inhusticia aki”, sr Glenbert Croes ta termina.
Expresionnan haci den e articulo aki no necesariamente ta refleha opinion di ArenaPoliti.co