Desde 26 di Januari 2015 carta di SKOA a cuminsa jega den man di mayornan y esaki a causa un preocupacion grandi serka tur mayor incluyendo esnan cu tin solamente 1 yiu na skol, corda esnan cu tin 2, 3 of 4 yiu. Hopi ta cuestiona e aumento di e schoolgeld diripente y asina drastico. E ta un decision hopi impactante, djies pensa por ehempel e efecto riba e mayornan cu ta cobra minimumloon, cual ta bow e asina jama “bestaansminimum”. E pregunta ta, a hasi un onderzoek na e porcentahe cu ja tin dificultad pa paga e 75.00 florin y buska un solucion no pa juda e mayor nan sino pa brinda e criatura un estudio, cual ta algo cu tur mucha na mundo tin derecho ariba dje? Ariba dje mester paga 150.00 florin na aircogeld, esaki ta un suma total di 400.00 florin pa cada yiu. Sin conta uniform y articulo nan di skol cual ta un lista largo cu skol mes ta entrega na e mayor nan na comienso di aña.

Gobierno di Aruba no tin ningun hustificacion pa corta den e subsidio na SKOA, ta unda nos placa di belasting ta bay anto? E respuesta ta simpel, Gobierno di Aruba tin su prioridad nan completamente robes. E projecto di Green Corridor cu a wordo firma recientemente, tin prioridad ariba educacion? Esaki ta un señal cu kier mantene e pueblo aki ariba un nivel abao? Cu ki fin? Ta critica mayornan bisando cu si no por paga e schoolgeld cu pakico a haña yiu, den otro palabra cu e criatura nan aki di menos rescurso no merece di ta riba e Mundo aki? Anto ora di campaña ta serka e mayornan aki boso ta bay buska voto! Foei Gobierno di Aruba, asina aki boso tin Aruba na pecho!! Dicon na hermana isla Corsow si educacion basico ta gratis?

E consecuencia di e aumento aki lo ta uno impactante y na final di dia lo causa un dolor na e muchanan cu pa motibo di esaki lo wordo stroba riba derecho di educacion. A introduci leerplicht, awor con e esaki lo funciona si e mayor (nan) no por paga e suma aki?  Lo duna e mayor (nan) aki un “boet”, awor si no tin ni pa paga e schoolgeld? Esaki lo trese preocupacion y hopi mas stress pa mayornan cu atrobe lo ta consecuencia pa nos muchanan.

Prioridad aki na Aruba mester ta na prome lugar ‘Educacion’, na di dos lugar ‘Educacion’ y na di tres lugar ‘Educacion’!! Un Pueblo EDUCA tin e miho futuro, un futuro firme y solido.

Expresionnan haci den e articulo aki no necesariamente ta refleha opinion di ArenaPoliti.co