Cu den gobernacion di MEP di 2001-2009 tabata tin corupcion y fraude na cantidad a keda aproba den e raport di WODC. MEP a bira sinonomo di corupcion y abuso di poder. Hasta tras di lomba di e minister di infrastructura un otro minister a firma un contract contra ley pa extende e negoshi di huurmento di edificio na famia y amigonan di gobernantenan di MEP. Esey tabata coronacion di e  era di MEP y "friends and family". En total mas cu 25 miyon florin di placa dinpueblo a bay pa famia y amigonan bou di e contractnan contra pueblo aki. Pa colmo pa edificionan cu no tabata tin mester of no tabata sirbi. Tur esaki a causa un trauma serca integrantenan di MEP. Pa e motibo aki nan sed pa venganza ta pone cu nan ta wak corupcion tur caminda. Pero nunca nan por presenta preuba! Esaki ta loke MEP ta haci den nan trabou di oposicion......si nan bin trabou. Di berdad Aruba merece un miho oposicion!

Awor ta e renobacion di hospital bou responsabilidad di SOGA ta e siguiente proyecto cu e lider di MEP kier para pasobra e ta acusa esnan envolvi y esnan responsabel di corupcion! Esaki kier men cu expertonan y dirigentenan di hospital, profesionalnan Arubiano den e directiva di Fondo di Desaroyo Aruba  y SOGA, e tecniconan y empleadonan publico di departamentonan di gobierno, incluso e ministernan, ta wordo acusa directamente door di e lider di MEP di corupcion. E ta acusa ministernan encarga cu salubridad di a yena nan saco. Palabranan duro. Tof! Awor falta e preubanan! Mi ta pidi e lider di MEP pa presenta e preubanan di tur loke e ta acusa otronan didje. Mi ta pidi'e pa no tarda si. Diahuebs awor tin e reunion publico riba e tema di renobacion di hospital. Mi kier pa e presenta e preuba di tur loke e ta acusa otronan di didje prome cu e reunion di diahuebs. E ora e reunion ta haya e caracter cu MEP y PDR kier dun'e. Nos no kier pa e bay Ministerio Publico (OM). Nos conoce e wega ey caba. Ta haci como sifuera tin algo, pero e unico cos cu nan ta haci, ta politikeria mientras ta laga un keho so serca OM. Tur hende por entrega keho. Hasta sin motibo of preuba. Di miembronan di oposicion den Parlamento di Aruba ta spera mas cu djies lesa corant y entrega keho. Haci bo trabou! Si bo ta acusa, presenta preuba. Si no, nos y pueblo MESTER conclui cu esaki ta nada mas cu otro grito di frustracion di MEP pa e fama di corupcion cu MEP di berdad a duna su mes y bon mereci!

Expresionnan haci den e articulo aki no necesariamente ta refleha opinion di ArenaPoliti.co