Pueblo di Aruba, tin un dicho cu ta bisa: “Ora bo scupi den laira, e ta cay bek den bo propio cara”. Aki mi ta referi na expresionnan di gañamento di sr. Mike Eman durante e ultimo campañanan politico, unda cual su persona manera un alma malo, a grita culpando, condenando na un manera contundente, sra Evelyn Wever-Croes di lo bay introduci un sales-tax, si partido MEP gana eleccion. Alaves cu partido MEP ta e partido di medida! Como un bon lantado di falso testimonio (diabolico?) cu sr. Mike Eman ta, su persona enberdad a logra pone e pueblo di Aruba duna su persona e confiansa mayoritario pa guia y maneha e pais pa dos periodo di gobernacion consecutivo. Pero, como hendenan prudente cu e pueblo di Aruba ta, nan ta bin bek pa bo! Pa pueblo yega na e berdad, e mester haci su mes varios pregunta.


Na 2009, tabatin un ambiente asina grandi ta reina di un situacion financiero precario, caotico di berdad, of ta sr. Mike Eman y su partido so a fomenta esaki? Ki rating Aruba tabata tin den bista di e instancianan manera IMF y S&P? Hulanda no a pone un KB riba gobierno di MEP asina leu cu mi por corda. Tur rapport financiero recien ta indica claramente cu Aruba mester bay bek na e situacion financiero di 2009! Kiermen, NO tabatin un situacion financiero malo anto! Dicon awendia si tur hende ta papiando di un situacion financiero caotico na Aruba? E Minister Hulandes sr. Plasterk na 2014 a menciona den su cartanan di un “financiële ramp” na Aruba. Gobierno di cua partido tabata na mando na 2014, kende tabata Minister President, con su nomber ta? Pueblo por menciona dicon tin un situacion financiero desastroso na Aruba? A base di ki ponencia pueblo mester por compronde cu e gobierno di AVP a masacra e fondonan publico di pais Aruba? Kendenan a maneha e pais aki manera un loco cu un scopet den su man, tirando tur rond? Dicon Hulanda diripiente a cay aden, poniendo e gobierno di AVP na cadena (KB), manera cacho na cadena? Straño pero, cua cacho ta pidi pa su doño mar’e? No ta yama bo mester yam’e of core su tras y gar’e pa mar’e? Sr. Eman mes a bisa Hulanda pa bin controla e presupuestonan 2014-2017 di Aruba. Si enberdad e situacion economico na Aruba ta manera sr. Mike Eman y su gang ta propaganda cu e ta, DICON anto e mesun gobierno di AVP, mester a tuma tanto medida asina contra e pueblo di Aruba? Mester menciona tambe cu e parti mas pisa AINDA FALTA pa bin riba lomba di e pueblo. Un total di 24 medida cu e instancia CFT, manda pa Hulanda, ta mencionando cu gobierno tin planea di introduci, pero cu asina mes esakinan NO ta suficiente pa alivia y mehora e situacion financiero catastrofico na Aruba! DICON mas medida si tur cos ta bon, MIKE? Cu gobierno di sr. MIKE EMAN mester bin cu mas medida riba pueblo di Aruba, ta claramente expresa den CFT su rapport di 29 december 2014. CFT ta skirbi cu si e gobiero di Aruba (AVP) drecha nan manera gubernamental financiero, na 2034 Aruba lo por yega bek na e nivel di 40%, cu tabata tambe e porcentahe na 2009! IMF a menciona esaki enfaticamente den su rapport di 13 februari 2015, na punto 6: “Savings are expected to come mostly from entitlement reforms, supported by a reduction in the number of public sector employees”. Reduccion di empleadonan publico, esta kita nan for di trabow! Na punto 7: “However, these objectives will most likely not be achieved with current measures. Without additional measures, deficits would remain elevated, and debt would continue to rise over the medium term”. E metanan lo no wordo logra cu e medidanan actual. Sin medidanan adicional, e deficitnan lo keda halto y e debenan lo keda crece riba e termino medio. Na punto 8: “a key priority is to introduce measures to reduce wage-related expenses”. E prioridad clave ta pa introduci medidanan cu lo reduci e gastonan relaciona cu salario di e aparato gubernamental. E palabra “measures”, ta significa MEDIDA na papiamento, ta menciona 11 biaha den e rapport di IMF. Pregunta final: Cua ta e partido di medida atrobe, kende ta e PM cu tin cu implementa medida riba su pueblo, kende enberdad a gaña su pueblo? ESUN CU COBA BURACO PA UN OTRO, E MES LO CAY ADEN!

Expresionnan haci den e articulo aki no necesariamente ta refleha opinion di ArenaPoliti.co