ORANJESTAD – Algun siman atras tabata tin un caso den Corte den cual e minister di labor a demanda un corant pa rectifica su acusacion pa cu "fiesta di permiso" cu lo  ta tumando lugar na Aruba. E minister no a gana e caso, y e corant no mester a rectifica.

E corant a lansa acusacionnan hopi serio den direccion di e minister, y e partido mas grandi den oposicion tabata en espera di un rectificacion di parti di e medio di comunicacion. Awor cu e corant mes no a rectifica, pero si a publica acusacionnan grave contra e minister, ta asunto di Parlamento pa actua. Na fin di dia ta Parlamento ta esun cu ta controla Gobierno.

Un di e acusacionnan masha serio tabata e caso masha cuestionable caminda cu e minister a aproba pa varios persona drenta Aruba pa traha como “security” siendo cu den Jobcenter tin 22 persona registra cu ta buscando trabou como “security”. 22 persona, algun nasi na Aruba, otronan nasi den exterior cu ta biba aki na Aruba pa hopi anja, pero no por haya trabou, ta wordo hala un banda, ta wordo laga SIN trabou.

Y kiko e motibo ta? E motibo ta cu e 22 hendenan ey segun e documentacion no ta di confia y no ta cumpli cabalmente cu trabou. Con e minister por aproba algo asina SIN investiga prome? Sin papia cu esnan responsabel prome?

E companianan di seguridad ta skibi den nan carta cu na Aruba nan no por haya ningun cu por hasi e trabou ni ta di confia, pero na Haiti si nan a haya hende cu por hasi e trabou y ta di confia.

Incluso varios Haitiano biba na Aruba cu nan famia, cu a perde trabou, ta wordo hala un banda, y peseye minister a permiti companianan di seguridad trese hendenan for di exterior. 

Cu esaki e minister a viola reglanan y leynan cu e mester respeta! Y mas serio ta cu aparentemente cu esaki e minister di labor a ganja Parlamento. Pasobra den un carta na lider di oposicion e minister a declara cu e ta cumpli cu su reglanan y awor ta resulta cu esey no ta e caso. E asunto aki por haya un rabo largo, cu consequencianan hopi serio pa minister di labor Paul Croes.

Expresionnan haci den e articulo aki no necesariamente ta refleha opinion di ArenaPoliti.co