Karel Maduro (MEP): Ansha di morto politico ta mal cos
![KarelMaduro01](/images/400x210/KarelMaduro01.jpg)
Segun e carta di CFT di dia 10 april ultimo, ta 24 medida tin menciona den e presupuesto di pais Aruba pa 2015. Pa colmo, ta mas critica cu elogio e gobierno di AVP a haya for di CFT. Sr. Herde simplemente ta insulta e pueblo di Aruba, trociendo e berdad di cu SU gobierno a implementa medidanan.
Laga nos analisa un rato dicon CFT ta bisa cu e MEDIDANAN di gobierno di AVP no ta suficiente. Uno, cu excepcion di e 170 miyon cu gobierno a inyecta den APFA na 2014, e presupuesto 2015 ta identico na esun desastroso di 2014. E presupuesto 2014 a wordo descualifica prome cu CFT a duna ordo pa incorpora e 170 miyon. Pues, cu of sin e 170 miyon, e presupuesto 2014 tabata un flop, un fracaso. Pa motibo di tempo, Hulanda a instrui sr. Gobernador pa firma esaki numa, despues di a incorpora e 170 miyon florin. Awor, e resultado di 2015 ta sali negativo 183.3 miyon. Pero den esaki tin hopi asunto cu no ta cuadra cu realidad, pa cual motibo CFT y Raad van Advies a desbarata y keur af e presupuesto 2015 completamente. Si e presupuesto di 2015 ta hole mesun stinki cu esun di 2014, pueblo ta kere cu gobierno, lo no haya e mesun reprimande (scual) cu e mesun gobierno a haya for di Hulanda na 2014? Ami ta kere mas pio ainda! Pasobra pa malo bo a bolbe haci e mesun fechoria y ple kens manera bo no sa di nada! Gasta fondonan publico di manera descabeya y favoreciendo sponsernan di campaña politico di AVP. Pesey sr. Herde tin cu bin padilanti y gaña pueblo cu nan no ta pusha medida den curpa di e pueblo. Ora cu e golpi bin for di Hulanda (AMvRB of e Klestee di Baca) AVP ta gaña muri y bisa pueblo cu ta Hulanda ta esun malo y no gobierno di AVP.
Un hende tin cu sali padilanti y desenmascara tipo di gobernante asina. E ta uno manipulativo, vil y malvado contra bon gobernacion di e pais. Asina sr. Baba Herde ta mustra cu e ta, bes tras bes cu su declaracionnan troci y insolente. E dia lo yega cu e palabranan di sr. Herde lo core su tras y tir’e cu piedra pa motibo di e manera abusivo cu el a uza nan. Un cos ta sigur, esaki ta muestra di e ansha di morto politico di e partido AVP, vocifera pa nan líder di fraccion den Parlamento.
Expresionnan haci den e articulo aki no necesariamente ta refleha opinion di ArenaPoliti.co