Dialuna Parlamento di Aruba lo debati riba e Ley cu ta trece cambio den e pensioen di ambtenaar y den locual pensionadonan di APFA ta recibi como pago di APFA. Den e Ley aki Gabinete Eman ta kita e voorjaarspremie, e reparatietoeslag y e najaarspremie di e pensionado di APFA.

For di basta dia tin e speculacion si e pensionadonan di APFA lo cobra e suma cu nan ta haya extra na december y si Gobierno di berdad lo stop cu e pago di tur e otronan sumanan cu ta cobrando banda di e pensioen. Den su contesta riba pregunta di Fraccion di MEP riba e preocupacion aki, Gabinete Eman a indica cu asina e Ley aki bin na vigor, lo stop tur pago na pensionado di APFA pa locual ta e voorjaarspremie, e reparatietoeslag y tambe e voorjaarspremie. Banda di esaki Gobierno a indica cu e pensioen di e pensionado di APFA no lo conoce ningun suma extra mas, ni si Gabinete Eman duna e empleado publico un suma extra awor aki of den futuro, e pensionado di APFA no lo recibi e suma aki. Esaki lo conta tambe pa tur esnan cu awor lo baha cu pensioen, nan tampoco no lo recibi ningun suma extra mas di Gobierno.

Segun Gabinete Eman e ta haci esaki pasobra una vez cu e empleado publico bay cu pensioen Gobierno no tin obligacion cune mas manera ta e caso di un ambtenaar activo. Ademas e pensionado di e fondo di PVL tin un pensioen basta ruim caba cu no por ser compara cu e ambtenaarnan cu awor ta activo. Mas aun Gobierno ta di opinion cu e pago haci na e pensionadonan di APFA no ta basa riba ningun contract of Ley cu nan por haci un apelacion riba dje. Segun Gobierno e pagonan a wordo haci den forma di un simpel “coulance betaling,” es decir, un pago cu Gobierno a haci djies pa tene e grupo contento y nada mas. Pesey awor cu e ta wordo kita e grupo no mester molestia curpa pa bay bringa e decicion aki ya cu segun Gabinete Eman nan lo perde e caso aki toch.

Mester remarca cu e decicion aki ta un banio di awa friew pa hopi pensionado di APFA ya cu nan ta conta riba e placa aki pa nan por sobrevivi na nos Pais ya cu dia pa dia tur cos ta subi den prijs y nan no tin manera pa por bay traha otro trabou pa haya entrada extra. Mas aun despues cu e grupo aki a tuma nota di e contesta di Minister Eman na sra Jacintha Thijsen kende a entrega un manifesto na Gobierno pa entre otro no mishi cu e suma extra aki, nan a carga speransa cu e pago lo sigi normal. Pero awor preto riba blanco Gabinete Eman ta contesta Parlamento cu e ta kita e voorjaarspremie, e reparatietoeslag y e najaarspremie di e pensionado di APFA.
 

Ta net e pensionadonan aki cu nan trabou duro a build up e Pais aki y ta duele pa mira cu nan tambe mester bay paga caro pa e mal maneho financiero y tur e enganionan di Gabinete Mike Eman. Un Gobierno husto y sincero nunca lo a perhudica e pensionadonan di e forma aki. Tanto cu Minister Eman a braza, sunchi y hasta baba nan pa haya nan confianza di un voto, awor e mandatario aki ta djies laga nan un banda. Pesey e apelacion ta bay na e grupo aki pa demostra y vocifera nan malcontento, pasobra esaki no ta sistema di trata cu hende grandi na e Pais aki.

23 november 2014

Expresionnan haci den e articulo aki no necesariamente ta refleha opinion di ArenaPoliti.co