Despues di e comportacion bergonsoso y vulgar di e lider di e fraccion di MEP diabierna pasa, awor ta cu gañamento ta purba lanta trahadornan di gobierno pa protesta. E decadencia y falta total di rason di e miembronan di e fraccion di MEP mester ta un berguensa pa e miembro y simpatisantenan di e partido. Diabierna e lider di MEP y algun di su miembronan di e fraccion a bay "off" y haci expresionnan totalmente fo'i sla y vulgar, ora nan no por a defende nan mes y e maneho cu nan partido a hiba den gobierno.

Minister Presidente Mike Eman tabata skerpi manera semper. Den un forma masha calmo y al caso, ela splica ta ki daño MEP a causa nos pais y cu ainda nan no tin berguensa pa esaki. Ela splica na placa chikito con MEP no a inverti den nos pais, nos trahadornan y pensionadonan, pero si den asuntonan di famia. Awor hasta tin placa ta bay pa e cuenta ERIS CRIUS cu e lider no kier splica. Tambe ela splica con den e ultimo cinco aña AVP si a inverti den trahadornan, den e fondonan di pensioen, den e entrada di pensionadonan y den infrastructura social, economico y fisico di nos pais. E lider di MEP a perde control y a cuminsa grita te hasta bira vulgar y falta tur hende respet. Incluso su mes!

GAÑAMENTO FORMAL

Den fin di siman MEP a purba na radio y den medionan di comunicacion pa tapa nan erornan y nan comportacion.  Awor MEP a recuri atrobe na gaña e trahadornan cu ta bay kita na prima di vacansi, e prima di 'back to school', e bashi premi y e gelijkbedrag den un di e reunionnan e siman aki. Nada di esey ta berdad!!! Tur hende ta wordo pidi pa sigui tur e reunionnan e siman aki riba e website di parlamento.aw of riba television pa wak kico si ta wordo trata na interes di henter nos pueblo!!! Loke sigur NO ta ni intencion, ni den niun reunion, ta kitamento di primanan di trahadornan. Anto net un dia despues cu e trahadornan a cobra e "gelijkbedrag" di 1500 florin y nan salario di november, MEP ta purba lanta e mes un trahadornan cu gañamento.

E siman aki ta trata e ley di pensioen nobo y pa kita e riesgo di bancarota cu MEP a laga atras pa e fondonan di pensioen. Ta bay trata e ley pa introduci e HEALTH TAX di 1% pa cubri costonan medico di henter nos pueblo cu nos tur ta contribui na dje. E siman aki ta trata e privatisacion di control di trafico aereo, e fiansa cu a duna Tiara Aira pa sigura cuponan di trabou di su trahadornan, e ley pa sigui inverti den turismo (TPEF) y e presupuesto supletorio di aña 2014. Tur hende mester sigui e reunionnan aki pa wak con MEP ta gaña pueblo y con AVP di berdad ta traha pa pueblo!

Expresionnan haci den e articulo aki no necesariamente ta refleha opinion di ArenaPoliti.co