Na varios occasion mi ta trece dilanti mi preocupacion pa e desaroyo den nos Mercado turistico. E ta un Mercado hopi dinamico y actualmente tin un trend nobo na Aruba cu mester tene debido cuenta cune. Minister Otmar Oduber awe na anja 2015 ta gasta 65 miyon florin mas na mercadeo di nos turismo y e resultado no ta uno di gaba. Si na anja 2008 gobierno tawata inverti 14 miyo den mercadeo di nos turismo awe e gobierno aki por medio di ATA ta inverti mas cu 80 miyon na mercadeo. Esnan cu ta traha den e sector turistico ta pensa otro cu minister Oduber pasobra e crecemento di nos turismo no ta un crecemento real sino mas bien un crecemiento ficticio.

E placa addicional cu a wordo usa aki por a wordo usa pa pais aruba riba otro prioridadnan. Loke mas ta preocupa nos ta e hecho cu e minister Oduber su vision ta pa atrae mas tanto turista posibel pa despues gaba cuanto turismo ta bon na nos pais y bisa cuanto placa a wordo laga atras. E enfoke di minister Oduber mester ta pa atrae turistanan di calidad. Turistanan cu ta gasta placa den nos economia. No turistanan cu ta gasta placa na supermercado, no turistanan cu ta bin cumpra productonan den supermercado pa hiba nan pais. No turistanan cu NO ta keda na hotel. No ta turistanan cu ta bin Aruba pa motibo di scarsedad. E ta hopi bon na altura di e trend aki pero lamentablemente e no kier accepta y admiti esaki. Su maneho pa atrea turistanan cu ta gasta placa no a duna ningin resultado y ta pesey e ta scohe e maneho di volumen di turista.

Ta mas cu logico cu si mas turista bin e placa cu ta wordo laga atras ta mas. Pero e pregunta, tur sector den e industria turistico ta sinti esaki?

Realidad di bida awe ta cu un turista awe na anja 2015 ta gasta mucho menos placa pa dia cu na anja 2008. Tur e cifranan di banco central ta indica esaki. Esaki ta dunabo di conoce cu e calidad di nos turistanan a bin ta cayendo desde anja 2008 y awe na 2015 nos a yega e nivel di mas abou di e placa cu ta wordo gasta averahe pa dia. Ni maske cuanto Otmar Oduber kier doctrina puebo cu turismo ta crece. Hecho y realidad ta cu e calidad den nos turismo a cai dramaticamente.

Averahe un turista a gasta na anja 2008  pa anochi basa riba tourism receipt di banco central:  $225. Averahe cu un turista a gasta na anja 2014  pa anochi basa riba tourism receipt di banco central:  $206. Aki por wak claramente cu awe un turista ta gasta $19 dollar menos. Bo por conclui cu e cifranan aki cu e calidad di awe no ta mescos cu promer y ta esaki nos a bin treciendo dilanti for di hopi tempo.

No ta cuestion di cuanto turista bo por trece Aruba, cuanto record bo por kibra pero ta cuestion di ki clase y ki calidad di turistanan bo ta trece. Nos vision ta pa atrea calidad y no cantidad y aki nos vision ta diferente cu esun di Otmar Oduber. Su vision ta pa atrae mas tanto turista posibel pa Aruba y logicamente si mas hende bin y si nan ta gastando menos placa pa dia mes e cantidad di placa cu nan ta laga atras lo ta mas. Directora di ATA a declara recientemente cu mester ahusta e cifranan di turismo e anja aki mirando e desaroyonan cu tin na Venezuela y cu esaki e ta confirma e trend nobo den nos turismo cu nos no por depende riba nan.

Expresionnan haci den e articulo aki no necesariamente ta refleha opinion di ArenaPoliti.co