Cambio den presupuesto di fraccion di AVP ta pa sigura cuido medico pa nos tur, cuida forsa di compra di trahado y ta baha deficit den presupuesto

E cambionan cu e fraccion di di AVP a trece den e presupuesto di gobierno pa e aña aki a sorprende tur hende, apesar di cu un dia prome ya e informacion a "lek" den prensa. E cambionan cu Donny Rasmijn, den nomber di fraccion di AVP, a presenta, ta un pakete di cambio importante y balansa. Na un banda ta baha e prima cu trahadornan ta paga pa e seguro medico di nan mes y nan famia cu 1%. E tabata 2.6%. For di juli awor e ta bira 1.6%. Esaki ta nifica cu e trahador ta keda cu mas placa di su salario. Na mes un momento e "Health Tax" (BAZV) ta subi cu 1%. Esaki ta pa sigura cu AZV ta sigui haya suficiente placa pa cubri cuido medico di nos tur. E forma cu e cambio a wordo haci, ta nifica cu e deficit di presupuesto ta baha tambe te 3.4%, cu ta mas abou cu loke a palabra como meta pa e aña aki. Door di esaki e chens ta mas grandi awor cu ta bay yega e punto di "presupuestonan balansa" mas tempran cu a planea. Una vez cu yega eynan lo cuminsa paga e debenan di Aruba di e ultimo 30 aña. Kiermen cu e cambio cu e graccion a haci den e presupuesto ta masha importante.

TUR HENDE TA PAGA PA SEGURO
E bon di a scohe pa baha e prima cu ta sali directamente for di salario di e trahado, ta cu e trahado ta keda cu mas di su salario pa e mes dicidi con e ta usa esaki. E bon di e BAZV ta cu no ta e trahado (y doño di trabou) so ta paga pa cuido medico mas. Awor tur hende cu ta biba of pasa tempo na Aruba ta paga. Tur hende cu cumpra algo di come of bebe, cu bin pasa un dia of keda un siman den hotel, tur hende cu cumpra paña of keiro riba nos isla den un bus di turista, ta paga pa e cuido medico. Pasobra tur placa di e BAZV ta bay pa cuido medico. Door di esaki no ta e 50 mil trahado y nan doño di trabou so ta paga pa cuido medico, pero awor e 1.8 miyon turista cu bin Aruba pa kea un siman of den crusero, tambe ta paga pa e cuido medico di nos tur. Di e forma aki AZV ta sigui haya su placa y ta depende menos di presupuesto di gobierno pa e haya su placa pa cubri e gastonan medico di nos tur.

CAMBIO GRADUAL
Tin hende cu ta haya cu e aumento di BAZV cu 1% ta mucho poco. E realidad ta cu si bo aumenta esaki mucho lihe y mucho halto, e ta bay stroba nos economia. Esey lo por tin consecuencia pa cuponan di trabou y pa forsa di compra di pueblo. Ta pesey e fraccion di AVP a scohe pa sigui cambia nos sistema di seguro social y di finansa di gobierno, den un forma gradual: mas poco poco, pero cu menos chens posibel pa causa un of otro daño, manera a sosode den otro paisnan. Rene Herde': "Nos a wak kico a sosode den otro paisnan cu a cambia cosnan mucho lihe y dramatico. Nan a corta gasto y hisa entradanan lihe. Nos hermana isla Corsow ta un bon ehempel. Bo ta soluciona e problema di finansa di gobierno, pero bo ta crea problema pa pueblo y pa economia. Nos no kier esey. Pesey nos ta sigui insisti di cambia den forma gradual. Y asina nos ta sigura e cuido medico pa nos tur."

Expresionnan haci den e articulo aki no necesariamente ta refleha opinion di ArenaPoliti.co