E destruccion mas grandi dia 27 augutus 2015 ta loke nos pais a perde. Awor diripiente e discusion na Aruba a bira e destruccion na Parlamento di Aruba. E issue NO ta e destruccion, e issue ta nos Status Aparte cu a wordo entrega pa Mike Eman, e issue ta cu Mike Eman a haci cu MEDIDA ta bira ley. E issue ta cu nos tin un promer minister cu a doblega pa presion y a entrega nos lucha facilmente sin bring ape. Un homber cu anja pasa na anja 2014 a bai un welga di hamber y tawata dispuesto pa muri pa 1 presupuesto y kier a yama Fort Zoutman, Fort Autonomia awe ta cambia 360 grado y ta entrega e lucha. Dia 27 augustus lo wordo recorda den historia como e dia cu Mike Eman a destrui nos Status Aparte.  Awe kier papia di cuanto placa e destruccion lo costa pueblo y kier haci esaki e discussion. Lastima con un gobierno y fraccion di AVP ta sigui cu nan doctrina y sigui brainwash e pueblo aki. Loke nan mester splica pueblo ta kende ta bai paga e debe di 4 biyon florin cu nan a crea, kende ta esnan cu ta bai wordo castiga cu medida y cual ta e medidanan cu ainda falta pa bin. Na anja 2009 e debe di pais Aruba tawata 49.7% di su GDP.
Awe na anja 2015 nos ta na 82% di nos GDP, apenas 5 anja gabinete Mike Eman 2. Den apenas 5 anja e gobierno aki a aumenta e deficit presupuestrio cu 1.4 biyon florin. Awor bo ta puntra bo mes si ta deliberadamente esaki a wordo haci pa e gobierno aki, di crea debe, fia placa, manda nos pais bancarota cu awe ta entrega tur cos. Aki nan caminda Hulanda a cuminsa torno nos status aparte y Mike Eman a bai di acuerdo cu esaki. Loke a sosode 27 augustus cu aprobacion di e ley CAFT ta un culiminacion di mal gobernacion. Desde awe henter e gobierno aki ta bao curatela.
Den articulo 14 di e ley di CAFT ta para e normanan cu pais Aruba mester cumpli cune pa por yega na un presupuesto balanza.  Den e normanan aki tur e medidanan ta hinca. Nos mester recorda e pueblo aki cu gobierno a acorda cu CFT cu nan lo bai tuma 24 medida pa cumpli cu e normanan. Den e medidanan aki ta para cu 50% di e arbeidscontractant lo bai cas, ta para cu lo aumenta e BBO, ta para cu lo bin cu transaction tax y asina lo bin un cantidad di medida mas. Gobierno mester splica pueblo con e ta bai reduci e deficit di e presupuesto di 9.4% pa 3.7%, esaki ta loke pueblo kier sa.
Durante e reunion nos a puntra promer minister con e ta bai yega na e normanan cu cu e mes a acorda. E no por a contesta ningun pregunta y manera semper a recuri na ganjamento y trocemento di berdad. E gobierno aki a permiti su mes tuma henter un pais haci pa anjas pero awe e realidad ta otro. Awe nos ta bibando den e realidad di un pais cu a ser enganja. Nos tur a ser enganja cu no tin problema financiero, cu no lo bin mas medida, cu nos lo conoce un mihor calidad du bida y cu gobierno lo reduce e costo di bida. Awe no solamente nos tin un gobierno cu a wordo poni bao curatela sino nos tin un pais den deterorio social y un pais bibando den pobreza. Anto awe kier DESVIA atencion cu cantidad di articulo pa brainwash hende. Kiko tin mas balor pa nos Arubianonan nos Status Aparte of algun glas cu a wordo kibra. Claro cu nos no ta di acuerdo cu e destruction cu a tuma lugar y nos no ta promove violencia. Nos ta lamenta loke a sosode pero nos ta kere cu e discusion no mester ta gefocused riba e destrucion sino mas bien riba loke nos a perde como pais y loke ta bin pa nos pueblo. Tur e danjo por wordo drecha pero loke nos a perde nos no ta haye mas.

Expresionnan haci den e articulo aki no necesariamente ta refleha opinion di ArenaPoliti.co