Durante tratamento di ley CAFT Prome Minister y fraccion di AVP a vocifera cu no tin ningun medida den e ley di supervision financiero. Remarcabel ta cu articulo 14 den e ley ta bisa bon cla kico e normanan ta, pasobra mester bay baha e deficit di 3.7% pa un surplus di 0.5% na 2018. Pa bo yega na cumpli cu e normanan bo mester bay genera entrada. Mester enfatisa cu e normanan den e ley ta na vigor y mester cumpli cu nan sino aanwijzing lo por cay.

Mester crea 330 miyon extra
Durante e reunion nos a haci diferente pregunta na minister Bermudez si acaso esakinan ta realisabel. Tambe nos a haci e pregunta con ta bay baha e gastonan existente y cual tipo di entrada lo drenta na vigor. Pero lamentablemente ningun di e preguntanan a wordo contesta.
Hecho ta cu e medidanan lo mester bay genera aproximadamente 330 miyon florin pa aña. Den e ley ta para cu kier baha e deficit di 3.7% pa un surplus 0.5%. Si nos cambia e percentahe den placa esaki lo ta 220 miyon florin excluyendo proyectonan manera Green Corridor cu ta bin cu peso financiero di 110 miyon florin. Esaki ta bisabo cu pa aña Aruba mester bay crea 330 miyon florin extra na entrada. Aparentemente parti di esaki lo bay wordo genera door di introduccion di ABB (Algemene Bestedingsbelasting) cu lo ta banda di 10-11%. Pero nos sa cu mester entrada extra cu lo nifica cu e belasting aki por bay den careda di 15% mes!

Un gobierno adicto
Adicionalmente gobierno tin pensa pa introduci un transfer tax cual lo bay ta riba entrada netto di tur persona. Nos sa cu 0.1% ta genera mas o menos 50 miyon florin pero nos tin entendi cu e percentahe lo ta 0.5% nificando cu gobierno lo bay ranca 250 miyon florin for di pueblo! Tambe Gabinete Eman tin pensa pa bay cobra mas accijns riba gasolin pasobra ta bay elimina nummerplaatbelasting. E medida aki supuestamente lo ta pa laga esnan cu ta core hopi paga mas belasting. Loke ta di lamenta ta cu esaki lo bay dal esnan di menos recurso cu ta bini for di pariba di brug. E medida aki tambe lo tin consecuencia pa tur vehiculo cu ta core hopi.
Esakinan ta djis 3 ehempel di tur e medidanan cu lo bay wordo implementa pa via di ley CAFT. Pero aparte di esakinan personanan lo bay haya retiro tambe! Gabinete Eman mester wordo cataloga como un adicto pasobra cada biaha ta keda malgasta fondonan publico. Nos di fraccion ta haya AVP culpabel pa tur loke ta sosodiendo y semper nos a vota contra e presupuestonan cu no ta corecto mientras AVP semper a aproba mal maneho. Y cu ley CAFT nan ta confirma cu nan mes no a haci nan trabou. 

Expresionnan haci den e articulo aki no necesariamente ta refleha opinion di ArenaPoliti.co