Parlamentario Juan Ady Thijsen: Pueblo cla y raspa a nenga Mike Eman
![Ady02](/images/779x490/Ady02.jpg)
E ultimo dianan por a mira un esfuerzo grandi di partido AVP pa presenta un massa grandi fracasa. Esaki segun parlamentario mr. Juan Ady Thijsen ta un mensahe cla y raspa di pueblo cu Mike Eman y AVP no tin sosten mas di e pueblo. Ta asina ki cu AVP usando plaka di pueblo a inventa un show pa kita atencion di e hecho cu AVP a percura pa kita autonomia financiero di nos pais y tambe pa kita atencion di e medidanan cu ta tumando lugar a consequencia di mal maneho di gobierno di Mike Eman y introducion di CAFT. Ayera por a constata cu despues di un campanja extenso di publicidad toch e show di AVP dilanti parlamento no a conta cu e presencia cu bo lo por spera di un gobierno di 13 ascientos y 33000 voto. Esaki ta e realidad politico cu Aruba ta biba aden, un gobierno legitimo cu sosten di 13 ascientos pero un pueblo cu no ta para su tras. Esaki ta trece un peso grandi pa nos democracia. Tin hopi descontento y mester percura pa tin espacio pa e descontento perfila su mes. Por mira cu e ultimo anjanan cu varios grupo di descontento a lanta den comunidad y cu e actitud di sindicatonan cu gobierno tambe a cambia. Ta keda na gobierno pa tene cuenta e descontento aki den su maneho of tuma e decision di bai gobernador y entrega retiro. Segun parlamentario mr. Juan Ady Thijsen ta bisto cu e gobierno no por cu e situacion penoso cu Aruba ta den y cu Gabinete Mike Eman no tin solucionan pa alivia problemanan y sigur no por presenta e ciudadano un calidad di bida mihor ni a corto ni largo plazo.
Expresionnan haci den e articulo aki no necesariamente ta refleha opinion di ArenaPoliti.co