For di basta tempo hopi ta puntra nan mes dicon Hulanda ta duna Gabinete Eman un trato asina preferencial apesar cu tin tanto disgusto ta reinando den Reino y na nos Pais debi na e mal maneho financiero di Gabinete Eman. E ta masha remarcabel cu despues cu Minister Mike Eman a yama Hulanda pa 'verkrachters' toch e ta bira forma parti di delegacion di Reino of ta hiba speech na nomber di Reino na Nacionnan Uni. E 'rosea politico' cu cada ves Hulanda ta duna na Minister Eman y Gabinete Eman ta debi cu Minister Eman ta coriendo campaña pa Hulanda por haya un stul den e Conseho di Seguridad di Nacionnan Uni. Den un situacion na unda cu medida ta wordo pasa na nos Pais pa por cubri lo necesario na Aruba, e ta inmoral pa gasta fondo publico di nos Pais pa haci propaganda pa Hulanda.

Propaganda pa Hulanda
E no ta un secreto cu Hulanda ta hibando un campaña fuerte pa logra haya un stul den e Conseho di Seguridad di Nacionnan Uni den e eleccion di oktober 2016. Den esaki Hulanda ta haciendo uso di Aruba su vision pa sostenibilidad pa gaba mundo cu un isla chikito den Reino Hulandes ta trahando pa bira completamente renobabel pa 2020 cu proyectonan manera parke solar, molina di biento y waiste to energy. Masha bunita, pero e realidad ta cu Pueblo ta pagando pa e proyectonan aki un prijs hopi halto djies pa por duna Minister Eman y Hulanda algo pa por haci propaganda cune pa gana voto di e islanan cu tin e mesun derecho di voto cu e Paisnan grandi den Nacionnan Uni. No ta pornada cu despues di e drama di welga di hamber, Minister Eman a bay hiba speech den nomber di Reino na e isla di Samoa. Banda di esaki, Hulanda ta haci uso di Aruba como un Pais cu hopi contacto den Latino America pa asina gana nan voto tambe den e eleccion aki. Ta pesey despues di e drama di presupuesto 2015, Minister Eman a sali bon brasa cu Minister Rutte na Panama y a fima Protocol enves cu Hulanda a ranca e pen for di Minister Eman debi na mal gobernacion.

Beneficio no ta pa Pueblo di Aruba
Si nos tabata un Pais rico no ta problema pa haci propaganda pa Hulanda. Pero nos Pais ta den un crisis financiero lidera pa Minister Eman na unda cu nos no tin fondo publico pa cubri e gastonan pa proyecto necesario pa nos Pueblo, pero ta hinca e placa den proyectonan berde na unda nos mester puntra nos mes si realmente nan ta beneficia e Pueblo of solamente algun comerciante. Den un situacion asina ta amoral cu fondo publico genera na Aruba no ta wordo destina na beneficio di e Pueblo di Aruba, pero ta wordo gasta na propaganda pa Hulanda por haya un stul na Nacionnan Uni.

Interes di Hulanda no por ta mas cu esun di e Pueblo di Aruba
Fondo publico genera na Aruba mester por wordo inverti na interes di e Pueblo di Aruba. Nos Pueblo ta beneficia si nos wordo bon goberna. Den un situacion na unda cu mal gobernacion ta wordo constata na nos Pais y cu Hulanda conforme nos Statuut mester evita cu nos Pueblo ta bay perdi na medida, no por existi e scenario na unda cu Hulanda ta pone man riba cabes di Minister Eman dunando e ‘rosea politico’ djies pasobra nan mester di dje pa haci propaganda pa sirbi e interes di Hulanda na Nacionnan Uni. Si e interes di Aruba no ta wordo sirbi pa Minister Eman, no por ta asina cu Hulanda ta probecha di esaki y sera wowo pa e mal gobernacion, neglishando e obligacion cu nan mes a bay di acuerdo cune den Statuut, esta pa garantisa cu e interesnan di entre otro e Pueblo di Aruba ta wordo sirbi adecuadamente. E interes di Hulanda pa haya stul den Nacionnan Uni no por ta mas cu e interes di e Pueblo di Aruba di por wordo goberna na un manera drechi. E ta un acto inmoral si scohe interes di Hulanda riba nos propio interes.

29 september 2015

Expresionnan haci den e articulo aki no necesariamente ta refleha opinion di ArenaPoliti.co