MEP: Solo ta sali pa nos tur
![Evelyn Congreso 2015](/images/imagen/Evelyn-Congreso-2015.jpg)
MEP TA GRADISI UN Y TUR PA E EXITOSO CONGRESO
STA CRUZ – Partido MEP ta gradisi un y tur cu a hasi e Congreso 2015 un éxito rotundo. Ya di oranan di trempan hendenan a cuminsa aglomera pa drenta, y e sala tabata yen trempan caba. Una bez e programa a cuminsa cu tur a candidatonan riba escenario, tabata manera e mecha a sende. Hendenan tabata contento, entusiasma y cu hopi energía positivo. E hermandad cu tabata brota di tur hende, tabata contagioso. E parti oficial a wordo habri pa presidente di Congreso, Rudy Richardson, sigi pa relato di presidente di partido dr. Gerrit Croes. Presidente di e comision financiero Marlon Werleman a duna relato, y despues a comparti su experiencia cu lider di partido Evelyn Wever-Croes, c uta desde cu Evelyn a caba di studia y cuminsa traha na Servicio di Impuesto. Marlon a enfatisa cu Evelyn ta un persona integro y bon prepara pa enfrenta e retonan. Miembronan di MEP siguientemente a entrega dos resolucion, y un peticion. Cu esaki miembrecia di MEP a pidi partido hasi tur lo posible pa habri e refineria bek, y pa gana nos autonomia bek.
RESPALDO INTERNACIONAL
Locual a resalta tabata e respaldo internacional cu partido MEP y especialmente su lider ta gosa di dje. Tabata tin presente presidente di COPPPAL Gustavo Carvajal, como tambe coleganan politiconan di Mexico, Santo Domingo, El Salvador, Venezuela, Curacao y Boneiro. Lider di partido Demokrat di Boneiro y alaves deputado Clark Abraham y vice presidente di MAN di Curacao Giovani Atalita a hiba palabra y a enfatisa riba e relacion entre partido MEP y nan partidonan, pero mas aun riba e cualidadnan di Evelyn como lider y e hermandad entre e partidonan y e islanan. E discursonan ey a cai den masha bon tera, mescos cu e mensahe cu lider di Partij van de Arbeid di Hulanda Diederik Samsom a manda pa Evelyn y Congreso, cu debi na un agenda hopi druk e no por a bin Aruba, pero ta desea Evelyn y MEP y tremendo congreso.
DISCURSO IMPACTANTE
E discursonan a bai un tras di otro, y e publico presente no tabata perde atencion. Prome e hoben Juan Pablo Aguirre cu a trese e punto di vista di hobennan riba politica, a demostra cu MEP ta duna hobennan un espacio pa vocifera nan opinion. Despues a sigi Guisette Croes, yiu mayor di Betico Croes den felis memoria, cu a elabora riba liderazgo. Sigi pa un homenage bon meresi na Nilo Swaen. Nilo Swaen a duna un discurso sumamente elocuente, algo cu hopi hende tabata spera hopi tempo pa scucha. Nel Oduber a finalisa e discursonan na un forma hopi original, manera Nel so por. Tur hende tabata contento di por a scucha e discursonan aki.
ELECCION DI LIDER
Nel Oduber a puntra e sala na final si ta aproba e re eleccion di Evelyn Wever-Croes pa e periodo 2015-2019, y e sala a duna un sosten total. Despues e presidente di partido a lesa e resolucion, y sala oficialmente a aproba Evelyn Wever-Croes como lider di MEP pa e siguiente 4 anjanan. Evelyn a duna un discurso tambe hopi elocuente, y hopi inspirativo, dunando e plan y vision di MEP. Pabien partido MEP cu un tremendo Congreso, pabien Evelyn cu re-eleccion di lider, y hopi exito. Campanja 2017, y ken sa talves prome, a cuminsa awor!
![Congreso MEP 2015 2](/images/imagen/Congreso-MEP-2015-2.jpg)
![Congreso MEP 2015 1](/images/imagen/Congreso-MEP-2015-1.jpg)
![Congreso MEP 2015 3](/images/imagen/Congreso-MEP-2015-3.jpg)
Expresionnan haci den e articulo aki no necesariamente ta refleha opinion di ArenaPoliti.co