NEW YORK- Prome Minister Mike Eman, a fungi tambe como anfrition di Ocean14, un side event di Nacionnan Uni. Un reunion, na unda a papia y discuti kico por haci pa e oceanonan cu ta wordo menasa door di e nivel di nan awa cu ta subi debi na e mundo cu ta birando mas y mas cayente. Banda di Rey Willem-Alexander, Sir Richard Branson di Carbon War Room  tabata un di e oradornan y participante na e discusion di e tema importante aki. Oceanonan cu un nivel halto di awa ta un menasa real pa Small Island Developing States (SIDS) na cual Aruba, Corsou y Sint Maarten tambe ta pertence.

Depsues di su bunita introduccion, Eman a pasa palabra pa Rey Willem Alexander, kende a bisa cu p’e ta un placer di por papia na un evento asina importante pa islanan SIDS (Small Island Developing States). Oceanonan ta e fundacion mas importante den desaroyo economico di e islanan SIDS.  Mayoria di e islanan mester bira ‘large ocean states’, pasobra nan por ta Islanan chikito fisicamente, pero grandi den termino di zonanan economico exclusivo. Esaki ta haci nan e guardiannan di un gran parti di e oceanonan di mundo.

Rey Willem Alexander a sigui bisa cu casi 700 miyon hende ta biba den regionnan costal cu no ta mas halto cu 10 meter di e nivel di lama.  “Hulanda sa di e retonan cu boso ta confronta. Hulanda, den Europa, ta un pais delta hopi bou, cu a yega di confronta inundacionnan pa siglonan largo.” E pais y e islanan cu ta pertence na Reino tambe ta SIDS. Ta pesey cu Reino ta traha duro riba e cambionan di clima y seguridad di alimentacion. E Rey a splica cu Hulanda ta pone hopi atencion y energia den haci algo na e cambio di clima, specialmente pa yuda esnan cu ta limita den nan capacidad y recurso. “Esey ta un di e motibonan cu nos ta trahando duro pa logra adopta un acuerdo global cu ta legal y terminante riba cambio di clima na Paris fin di aña.”

Rey Willem-Alexander a sigui bisa cu Hulanda ta di opinion cu Public Private Parnerships ta fundamental den implementacion di cualkier acuerdo. “Nos Reino activamente ta saca un man pa yuda paisnan cu ta enfrenta retonan similar cu nos. Nos ta comparti nos experiencia cu maneho di awa cu tur pais rond mundo y nos ta pone experiencia Hulandes riba tereno di awa y delta disponibel pa gobiernonan starnhero cu ta buscando urgentemente con preveni un disaster relaciona cu awa.  Un team Hulandes a bishita e islanan Vanuatu y Kiribati pa conseha nan gobiernonan  riba asuntonan di awa.  Tambe nos ta ofrece beurs y cursonan pa islanan SIDS na e ‘Unesco Institute for Water Education’ na Hulanda.”

Na final di su discurso e Rey a papia riba e candidatura Hulandes pa e asiento den Conseho di Seguridad di Nacionnan Uni  pa añanan 2017-2018. Relaciona cu esaki el a bisa cu un di e prioridadnan di Hulanda ta bay ta pa yuda e islanan SIDS cu nan retonan. “No cabe duda cu si nos wordo eligi nos ta laga e stem di SIDS resona den e Conseho di Seguridad. Hunto nos por percura pa oceanonan saludabel y traha pa yega na un desaroyo sostenibel pa nos nacion y nos hendenan.”

Expresionnan haci den e articulo aki no necesariamente ta refleha opinion di ArenaPoliti.co