MEP: Lider di MEP Evelyn Wever-Croes a bishita scolnan y a combina esaki cu dia di bisti sombre di FADA
ORANJESTAD – Lider di MEP Evelyn Wever-Croes ta reuniendo cu varios scol pa por pone su mes mihor na altura di e desaroyonan den ensenjansa, y especialmente e retonan, desde e perspectiva di e scol mes. “Den Parlamento varios biaha nos ta trata temanan relaciona cu ensenjansa y nos hobennan, pero eyden mes bo no ta haya e informacion mas importante di e retonan y e desaroyonan. Semper bo ta haya informacion filtra. Pesey pami ta hopi importante pa scucha di e scolnan mes kiko ta e desaroyonan y especialmente ki reto nan ta encontra den esaki. Especialmente pa motibo cu nos ta bai trata e presupuesto 2016 pronto, mi kier ta bon informa.
Ya mi a bishita varios scol caba y e siman aki mi a reuni cu cabesante di Colegio Laura Wernet Paskel y tambe cabesante suplente y IB-er di Scol Paso Pa Futuro. Mi a haya hopi informacion importante pa asina mi por hasi mi trabou mihor den Parlamento. Nos muchanan ta nos futuro, y mi tin hopi preocupacion pa nos calidad di ensenjansa. Mas y mas mi ta sera conosi cu maestronan sumamente dedica y bon prepara, y mi ta conbensi cu hunto nos por mehora e calidad y inova ensenjansa. Pero tin retonan tambe nos dilanti, y eseynan nos mester traha pa soluciona.
Casualmente e dia cu mi a reuni na Scol Paso pa Futuro, tabata e dia di bisti sombre di FADA, pa aumenta concientisacion pa cu problemanan di abuso y adiccion di droga. Mi ta contento di mira cu scolnan ta participa na e campanja di concientisacion, pasobra awendia no tin edad mucho jong pa papia cu bo yiunan di droga y su efectonan.
Mi ta hopi satisfecho di e reunionnan cu mi a tene te awor, pa asina mi por ta mihor informa ora ta trata temanan di ensenjansa den Parlamento”, Evelyn Wever-Croes a duna di conose.
Expresionnan haci den e articulo aki no necesariamente ta refleha opinion di ArenaPoliti.co