MIKE EMAN A NENGA DI REACCIONA Y DUNA TELEGRAAF INFORMACION!  

ORANJESTAD – Den conferencia di prensa di MEP lider di MEP Evelyn Wever-Croes a elabora riba e articulo cu a Sali publica den un corant hulandes De Telegraaf titula "De bende rond Mike Eman". Den e articulo aki e corant hulandes ta splica detayadamamente den cuanto caso di corpucion e ministernan di gabinete Mike Eman ta, y ta cuestiona e hecho cu ainda nan ta na mando, y cu ministerio public no ta investiga.
“Mi ta lamenta cu na momento cu Mike Eman a wordo pidi su reacciona, ela mustra cu e no tin curashi y a scohe pa no reacciona. Cu esaki el’a confirma tur locual ta para den e articulo. Ta tristo cu e prome minister ta keda sin reacciona, y despues ta manda su parlamentarionan bin ataca MEP”. Lider di MEP tabata hopi categorico: “No bin culpa MEP pa bo mal maneho, no bin culpa MEP pa tur bo escandalonan, y sigur no bin sconde tras di lomba di MEP pa tapa bo propio cobardia. Ki mishi prome minister di un pais ta gewoon scohe pa laga nan papia asina di dje, y no sa sali defende su mes? Ta un prome minister hopi swak esaki ta!”, Evelyn Wever-Croes a duna di conose.
Lider di MEP a splica cu e reportero aki tin algun tempo caba ta busca informacion for di gobierno y ora e no haya e sa di buska serca oposicion. Y na otro ocasionan ta e reporter mes a manda informacion pa oposicion. Esaki no ta bon propaganda pa Aruba pero e ta e tristo realidad.
Aparentemente e contenido di e articulo a pone hopi hende nan fuse bula y awor ta reclama cu ta MEP lo ta causando problema pa Aruba. Esnan di fraccion AVP, en bes di ataca MEP, awe mester a lanta y cuestiona nan lider pasobra e reportero a skibi cu el’a hasi Mike Eman diferente pregunta y Eman a opta pa no contesta nada.
Pero ta importante pa señala cu den e articulo ta papia cu tin hopi escandalo sin cu gobierno ta duna cuenta. E articulo ta papia di hechonan manera cu a hiba nos pais den abismo financiero pero tambe riba tiroteonan y menasanan cu a tuma lugar dia 27 augustus 2015. Tur esakinan ta berdadnan cu ta wordo treci dilanti. E reportero simplemente a cuestiona tur e puntonan aki y a pidi clarificacion di prome minister Mike Eman locual no a sosode.
Escandalonan cu a wordo treci padilanti ta por ehempel e asunto di e aseguro medico di studiantenan na Hulanda y e fiesta cu permiso bou Minister di labor, cual ambos caso tin veredictonan di  hues contra e ministernan. Con Baba Herde por bisa cu ta ganjamento?
Tambe e ta papia di strawberry gate unda cu Minister Oduber ta envolvi. E articulo tambe a inclui escandalonan relaciona cu bidfixing di projecto hospitaal. A subraya cu tin mas escandalo cu mata di kwihi y cu cierto miembronan di prensa no ta cuestiona y tapa informacion di e casonan aki.

Ministerio publico a laga sa cu tin hopi bai bin den mundo politico y pesei nan ta evalua riba nan mes ki ora pa cuminsa un investigacion.
“Mi a bisa na varios occasion cu Ministerio Publico na Aruba no ta funciona, pasobra si ta MEP tabata den gobierno sigur un cantidad di investigacion lo a wordo hasi caba. Pero e hecho mas serio ta cu Mike Eman a nenga di duna reaccion mustrando asina no solamente su cobardia pero mas aun su complicidad. Como lider di e pais e ora ey bo no mester sconde tras di MEP. Ta abo a maneha e pais aki causando escandalonan y awor cubo mester duna cuenta bo ta nenga atrobe. Carga bo responsabilidad y no sconde tras di MEP”, tabata palabranan expresa door di Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co