Ta spera cu presidente di parlamento y ministerio publico actua riba parlamentario Melvin Tromp!  

Recientemente parlamentario Melvin Tromp di fraccion di AVP a bolbe haye den problema cu husticia. No ta promer biaha Melvin Tromp ta comporta su mes asina den hende. Den parlamento caba tur hende por sigui su comportacion inapropia riba television caminda e ta bully y ta insulta tur hende den fraccion di MEP y muy especialmente e damanan di MEP. Melvin Tromp na varios occasion a coba mama den sala di parlamento y cada vez ta yama miembronan di MEP na diferente nombernan di animalnan. Hasta el'a invita lider di MEP bin cas su "cos", pero a bis'e corda bin cu bril si! Un persona sin manera y sin escrupulo asina hamas y nunca por ta un representante di pueblo. Su compartacion den parlamento ta papia pa su mes.

E parlamentario di AVP a haye den un discusion na un café riba Linear Park y aki ta caminda, manera ta custumber, e ta perde den su rabia y a ataca un ciudadano. No solamente e la ataca e ciudadano verbal sino e la agredi e ciudadano fysicamente. No ta conosi si Melvin Tromp tabata bou di influencia di alcohol of cualquier otro substancia.

E ciudadano cu a wordo maltrata a entrega keho pa maltrato contra parlamentario Melvin Tromp na ministerio publico. Sinembargo Melvin Tromp a laga sa caba cu Ministerio Publico no ta bai tuma accion contra dje pasobra e tin relacionnan hopi intimo cu hendenan den top di Ministerio Publico.

E asunto aki ta uno serio pasobra no por ta asina cu miembronan di parlamento ta cana riba caya ta bati y maltrata hende y nada ta wordo haci. Unda minister di husticia Douwers a keda den e asunto aki? Tin un silencio hermetico y ningun dia a tende miembronan di fraccion di AVP of minister di husticia papia di e sucedido aki. E actitud y comportacion aki di e miembro di parlamento aki no ta esun correcto y no por permiti esaki. Parlamento ta e organo mas halto di nos constitucion y parlamentarionan ta fungi como ehempelnan pa nos hobennan. Ki ehempel un parlamentario manera Melvin Tromp ta duna na nos hobennan??

Nos ta spera cu presidente di parlamento actua riba comportacion di Melvin Tromp pasobra e ta birando un menaza no solamente pa sociedad sino tambe pa miembronan di parlamento. No solamente nos ta spera presidente di parlamento actua sino tambe ministerio publico haci su trabou y investiga e caso aki profundamente pasobra loke e miembro di parlamento aki a haci ta castigabel pa ley. E la comete un delito y a maltrata un ciudadano severamente.

Expresionnan haci den e articulo aki no necesariamente ta refleha opinion di ArenaPoliti.co