Ya ta algun siman cu e parlamentario di AVP Melvin Tromp a bolbe haye den problema cu husticia, y a dicidi di agredi un cuidadano den un bar na Linear Park, di puro tricion, mandando e cuidadano te na Eerste Hulp. E cuidadano a entrega keho, pero te dia di awe Ministerio Publico no a atende cu e keho aki. No ta prome biaha cu Melvin Tromp ta comporta su mes asina den hende. Den parlamento caba tur hende por mira y scucha su comportacion bulgar y totalmente inapropia, insultando tur hende den fraccion di MEP y muy specialmente e damanan di MEP. Pero tambe cu esnan den tribuna publico. Melvin Tromp na varios ocasion a coba mama den sala di parlamento y cada bes ta yama miembronan di MEP na diferente nomber di animal. Hasta el a invita lider di MEP bin cas su “cos”! Un persona sin manera y sin escrupulo asina hamas y nunca por ta un representante di pueblo. Su comportacion bochornoso den parlamento ta papia pa su mes. Sinembargo Melvin Tromp a laga sa caba cu Ministerio Publico no ta bay tuma accion contra dje pasobra e tin relacionnan hopi intimo cu hendenan den top di Ministerio Publico.

Parlamentarionan di AVP ta haya nan mes constantemente den escandalo tras di escandalo. Henter Aruba ta corda e escandalo di e parlamentario di AVP cu a urina tur su panja ora el’a box cu auto, y algun dia despues a plama henter un muraya di cas abou. Tur hende por corda e escandalo di un dama cu lo a declara cu e parlamentario lo a ofrese droga pa por sali cun’e. Parlamentario cu ta core auto bou influencia y dal den un supuesto pochi di mata memey di caminda cu propiedad di pueblo. Otro cu ta desaparese dianan largo, y despues ta aprese bek un tiki tipsy. Ni di lubida e parlamentario cu pa motibo di tene relacion sexual riba lessenaar cu un otro pareha, su pareha a basha porta di oficina abou. Of e parlamentario cu a wordo gara ta horta wisky y jeans. Y asina tin mucho mucho mas pa menciona.

Bolbiendo bek na e cuidadano maltrata, e asunto aki ta uno serio pasobra no por ta asina cu miembronan di Parlamento ta cana riba caya ta bati y maltrata hende y nada ta wordo haci. Dicon tin un silencio hermetico riba e caso aki? Especialmente e lider di e partido ni e lider di e fraccion cu a distancia nan mes di e abuso aki, of acaso esey ta algo normal den cultura di AVP? E actitud y comportacion aki di e miembro di Parlamento aki no ta esun correcto y no por permiti esaki. Parlamento ta e organo mas halto di nos constitucion y Parlamentarionan ta fungi como ehempelnan pa nos hobennan. Ki ehempel un Parlamentario manera Melvin Tromp ta duna na nos hobennan??

Nos ta spera cu presidente di Parlamento actua riba comportacion di Melvin Tromp pasobra e ta birando un menasa no solamente pa sociedad sino tambe pa miembronan di parlamento. No solamente nos ta spera presidente di Parlamento actua sino tambe Ministerio Publico haci su trabou y investiga e caso aki profundamente pasobra loke e miembro di Parlamento aki a haci ta castigabel pa ley. E la comete un delito y a maltrata un ciudadano severamente.

Expresionnan haci den e articulo aki no necesariamente ta refleha opinion di ArenaPoliti.co