Segun Parlamentario mr. Juan Ady Thijsen e ultimo seis anja Aruba a conoce un entrada masal di illegalnan na nos pais. Esaki a bin na momento cu e gobierno nobo bow liderasgo di Prome Ministro Mike Eman hunto cu Ministro Dowers  y Ministro Sevinger a elimina e control ariba nos costanan , a stop uso di radar y tambe no a sigi mas cu controlnan na pia di trabao y tampoco a persigi personanan cu a keda illegal na nos pais despues di a drenta como turista of a drenta via nos costanan. Di otro banda a hiba un maneho man habri pa loque ta toca entrada via aeropuerto of wafnan. Supuesto turista ta drenta facil (y esaki te cu e dia di awe) un paar di dia despues ya ta trahando. Consequencia di tur esaki ta cu tin un cantidad di  miles di illegal ta cana rond riba nos isla. Esaki tin consequencia y peliger riba diferente ramo.

1. E ta un peliger grandi pa salubridad publico dor cu e personanan aki no ta ser controla. Awor a sali na cla cu tin hasta malaria a ser discubri na paisnan origen di hopi illegal pero tambe otro malesanan por ta drentando.
2. E ta kita trabao di nos hendenan local mientras ta conoci cu desempleo ta grandi entre otro 28 % di nos hubentud.
3. E ta un peliger grandi pa seguridad di nos pueblo, bo no sa cuanto criminalnan ta drentando.
4. E ta un peliger grandi pa e seguridad nacional di nos estado pasobra den e mundo di terrorismo actual bo no sa ken ta drentando cu ideanan radical
5. E ta un problema grandi pa e finanzas publico pasobra gobierno no ta haya e entradadan cu e mester haya basa riba nos leynan.

Parlamentario mr. Juan Ady Thijsen ta lamenta cu gobierno ta sinti man cruza y no a haci nada pa proteha e pueblo te awor aki. Esaki ta mustra un biaha mas e incapasidad y irresponsabilidad di e goberno aki y pesey mester bai cas mas pronto cu ta possible.

Expresionnan haci den e articulo aki no necesariamente ta refleha opinion di ArenaPoliti.co