Parlamentario mr. Juan Ady Thijsen (MEP): Plasterk ta complice den e crimen di Mike Eman contra pueblo di Aruba
Segun Parlamentario mr. Juan Ady Thijsen despues di un paar di anja cu bo no sa si Ministro Hulandes Ronald Plasterk pa Asuntonan di Reino ta carni o pisca awor nos por saka e balansa na unda definitivamente Plasterk por ser cualifica como complice di Mike Eman den su masacre pa cu finanzas di Aruba. Na Hulandes nan ta bisa cu un gewaarschuwde man telt voor twee y apesar di ta debidamente pre avisa di maniobranan di Prome Ministro y lider di AVP Mike Eman toch Ronald Plasterk a escohe pa mantene man riba cabez di Mike Eman, e lider di e criminalnan cu a endeuda y masacra nos Pais. Ministro Plasterk mes a bisa parlamento Hulandes na 2013 cu e situacion di Aruba no ta saludable pero toch constantemente ta escohe pa e camindanan mas suave pa atende cu Mike Eman. Statuut di Reino ta pone bon cla kiko ta obligacionan. Mike Eman y su criminalnan a faya articulo 43 inciso 1 di Statuut dor di no cumpli cu su zorgplicht, cual ta entre otro percura pa un bon gobernacion. Envez di haci esaki Mike Eman a hiba e pais financieramente den bancarota. Ministro Plasterk no a cumpli cu articulo 43 inciso dos di Statuut cual ta e waarborgfunctie. Plasterk mester a tuma medida dor di bin cu un Algemene Maatregel van Rijksbestuur kitando autoridad di Mike Eman y su criminalnan pa haci mas danjo. Constantemente ta haci palabracionan y ni Plasterk ni Mike Eman ta cumpli cu loque nan mes ta palabra. Na final di cuenta segun Parlamentario mr. Juan Ady Thijsen e pueblo ta carga consequencianan di medidanan cruel y Mike Eman y su criminalnan ta sigi fiesta. Esaki ta mustra un biaha mas e incapasidad y irresponsabilidad di e gobierno aki y tambe esun di Ministro Ronald Plasterk y pesey tur dos mester bai cas mas pronto cu ta possible.
Expresionnan haci den e articulo aki no necesariamente ta refleha opinion di ArenaPoliti.co