Pueblo di Aruba, sr. Eman a declara cu su persona ta contento con cosnan ta bayendo den un direccion sumamente positivo. Si esaki ta e caso, dicon mester a bini cu un presupuesto supletorio anto? Cual presupuesto tin cu trece entrada adicional den caha di gobierno, bendiendo patrimonionan nacional pa asina haya placa pa gasta den e maneho descabeya y bruha di gabinete Eman. Kico gobierno di AVP lo bende otro aña pa completa nan malgastamento di fondonan publico? Haciendo extra movecion den maneho, pa asina riba papel keda registra den un forma manipulativo cu e presupuesto ta “on the dot” manera sr. Herde ta gaba cu ne. Si gobierno tene cuenta cu e balor di e edificionan cu lo wordo bendi como entrada pa 2015, den 2016 e propiedadnan aki ta keda comprometi y no ta forma parti di e pertenencianan mas di gobierno! AVP y gobierno Eman no por haci negoshi cu propiedad di e pueblo!? No tin ley contra esakinan? Si no a bini cu e presupuesto supletorio, esaki lo a bira “on the dot” cu ta significa precisamente calcula? Ta na comienso di aña gobierno mester tin e presupuesto cla y durante e aña parlamento tin cu controla si gobierno ta cumpliendo cu esaki.

Sr. Eman y sr. Herde mas tur e parlamentarionan di AVP ta insulta e inteligencia di e pueblo Arubano, y muy en particular e 33.000 almanan cu a duna nan e poder! Dicon? Pasobra e aña practicamente a transcuri. Bo por wak atras den e gastonan y recalcula y traha bo estado di entrada versus gastonan completamente di nobo! (Sinberguensura). Gobierno por trece cualkier plan di halucinacion manera hende droga den wega! Nan por bisa di ta bay bende un parti di Aruba mes. Benta di e edificionan a tuma lugar caba, si of no? Otro medidanan pa subi entrada a tuma lugar caba, si of no?  AVP su gobierno ta warda te na December pa presenta un presupuesto supletorio. Asina limpia nan curpa di tur sushi y haci nan cara gubernamental bunita. Gastonan SI a keda haci caba!! E fondonan publico si a keda maltrata, viola durante e aña cu ta cabando. Dicon sr. Herde y sr. Eman no a bin gaba riba e prome presupuesto di 2015? Dicon nan no ta menciona NADA di loke CAFT/CFT a bisa di e presupuesto inicial y di esun supletorio di 2015? Ban papia awor di esnan cu a controla bo y cu tin bo mara na cadena manera cacho. Aruba ta bow di supervision financiero, si of no? Kendenan a acepta y a vota pro den parlamento di Aruba pa esaki? Anto CAFT/CFT no tin nada di bisa? Pa respet bo no por bisa sr. Herde y sr. Eman kende nan mester bay gaña! Pero e ta un insulto grandi e forma con e dosnan aki en particular ta trata cu e pueblo di Aruba.  Aruba ta bayendo practicamente den un desastre financiero, pero nan ta keda manipula e mente di hende cu tur cos ta positivo. Nan ta haci cu Aruba, mescos cu un hende cu ta hiba un grupo di carne bay mata na abattoir y e carnenan no sa kico ta spera nan! DIOS spaar Aruba!

Expresionnan haci den e articulo aki no necesariamente ta refleha opinion di ArenaPoliti.co