Durante e momentonan dificil cu Carnaval di Aruba y muy enespecial nos ‘Calypso & Soca Monarch’ festival a jega UN punto di mas abao den nos historia Carnavalesco, PPA ta di opinion cu ta na su lugar pa kada partido por analisa su maneho pa cu nos cultura y projecta su vision pa mejora esaki den futuro.

Carnaval mescos cu varios otro fiesta cultural di Aruba manera ‘dera gai’ y musica di dande pero tambe nos musica di ’aguinaldo y gaita’ y e musica walts, etc cu nos ta jama como ‘nos musica typico’ mester por worde positivamente influencia pa un maneho cultural di parti di gobierno. Esey ta ensera un maneho pa stimula e desaroyo cultural di nos pais.

PPA pa hopi anja ta bisa cu lo mester tin un maneho unda gobierno ta pone fondo disponibel pa stimula kada sector di nos bida cultural arubiano y aki nos no ta limita nos mes na musica pero na varios otro sector di nos producto cultural arubano.

Historia di un pais ta produci locual ta su cultura….y den esaki pais Aruba a keda tene fuerte na e desaroyo di Carnaval (pa mas cu 60 anja !) pero tambe na e musica di ‘Calypso y Soca’ durante periodo di Carnaval. Especialmente pa e pueblo di San Nicolas cu tabata e prome ‘melting pot’ di Aruba unda mas cu 40 nacionalidad a traha y biba junto. Pa e pueblo di San Nicolas festival di ‘Calypso y Soca’ ta worde mira como un herencia cultural di nos hendenan cu a biba junto, celebra junto y cu a contribui na gran forma na e bida cultural arubano. A contribui den curso di nos historia cu ‘musica di steelband, musica di Calypso y Soca, Carnival (on di road), Jouvert Morn y mucho mas.

MANEHO CULTURAL SEGUN VISION DI PPA :

Na prome lugar PPA ta kere cu lo mester tin un PLAN NACIONAL cual ta worde sosteni pa e presencia di un ‘plataforma nacional di cultura’ cu ta representa kada sector di nos cultura.

Na di dos lugar, PPA ta kere den fondo di pueblo aloca pa sostene y stimula desaroyo cultural di Aruba den tur su facetanan.

Na di tres lugar, PPA ta kere den un maneho unda gobierno ta sostene fundacionan encarga cu nos Cultura cu e sosten di ‘professionalnan’ pa juda unda kizas e fundacion su forza no ta jega, enespecial pa dedica atencion na e parti administrativo y organisatorio pa hustifica fondo publico manera debe ser.

MANEHO GENERAL PA CU NOS CARNAVAL ARUBIANO !!

PPA ta kere cu Gobierno lo mester tin un Vision y maneho cu lo mester funciona como un sorto di cuadra cultural (raamwerk) dentro di cual un fundacion cu ta encarga cu nos Carnaval Arubiano y na unda otro organisacionan/fundacionan tur lo tin nan tarea fiho. Apesar cu fundacionan e.p. no conoce miembrecia un condicion lo mester ta cu e fundacion lo mester por demonstra un funcionamento ‘democratico’ cu espacio pa cambio periodicamente. Na mes momento pa desaroyo di nos Carnaval lo mester tin un maneho cu ta garantisa cu tin espacio pa ‘ideanan nobo’ y cu un proposicion nobo ta hanja e atencion debido y completo di e fundacion encarga cu nos Carnaval ! (Carnaval di Pueblo !!) Esta un evaluacion interno cu decisionan argumenta pa pueblo mira cu nan proposicionan ta hanja e atencion mereci.

Maneho lo mester ensera cu den decreta un ‘agenda pa Carnaval’ lo respeta e historia tras di cierto evento carnavalesco cu e meta pa e impacto social economico keda unda e lo mester ta p.e. actividadnan cu a nace historicamente na San Nicolas lo mester keda na San Nicolas manera p,e, nos ‘Calypso y Soca Monarch Contest’ y p.e. nos Jouvert Morn e.o. ta actividad cu ta mara na e historia di San Nicolas y di Carnaval arubiano.

Pesey PPA tabata e ‘prome y unico’ partido politico cu a presenta e idea pa un ‘Carnival Village combina Carnival Museo’ pa worde construi na San Nicolas. ( Nos por a nota cu e Plaza di e Carnival Village a worde construi pero NO e VILLAGE mes !! Tambe nos a nota cu Carnival Museo cu pa motibonan di factibilidad economico PPA a pone junto du e Carnival Village No a worde ejecuta apesar di tanto inversion di gobierno ultimo anjanan !)

PREMIONAN PAGA PA GOBIERNO !

Fuera di ‘subsidio’ di gobierno na e fundacion encarga cu nos Carnaval y na esnan encarga cu organisacion di nos festival di ‘Calypso y Soca Monarch’ y nos Tumba festival PPA ta kere cu gobierno mester por stimula Carnaval di Aruba nos fiesta nacional cu sosten di algun premio cu lo mester sirbi como un estimula pa e desaroyo di Carnaval por continua como nos fiesta nacional cu un impacto economico /social educativo positivo.

EVENTO MUSICAL CU MUSICA CARIBENSE/LATINO ANUALMENTE NA SAN NICOLAS !!

Pa stimula desaroyo di nos musica y diferente ‘genre musical’ cu nos pueblo ta aprecia, PPA kier lanza un vez mas nos idea pa un ‘evento musical Caribense/Latino’ cual lo mester tuma lugar na San Nicolas anualmente p.e. den luna di oktober (tin varios evento musical cu ja kaba ta tuma lugar pabao di Brug( cual lo mester consisti di evento dedica na varios ‘genre musical’ …..p.e.. ARUBA LATIN CARIBBEAN RHYTMS FESTIVAL …of Caribbean Rhytms Music Festival. Un anochi dedica na p.e. ;Calypso y Soca, un anochi Latino, un anochi di raeggae etc…. Na unda bandanan cu lo worde escoge pa pueblo riba e ‘genre musical’ pa participa junto cu bandanan invita…..durante e anochi dedica na e ‘genre’ encuestion. Aki tin tarea di vision pa gobierno, departamento di Cultura y tarea di coordinador combina cu partipacion di sector priva …. E evento aki lo mester worde mercadea anualmente den Caribe y lo por bira un evento cu un impacto economico grandi pa Aruba y San Nicolas. Entodo caso ‘food for thought’ !!

PPA tin aprecio pa tur ciudadano cu ta duna nan contribuiccion na desaroyo di nos Cultura arubiano y e mundo di musico arubiano den e articulo aki mas atencion a worde dedica na un vision/maneho di nos Carnaval mirando e tantisismo problema sin embargo PPA su maneho cultural ta hopi mas amplio y nos lo presenta mas di nos vision pa diferente area cultural arubiano den futuro cercano. No kabe duda cu lo tin ‘critico’ cu lo bisa …net awor cu tin un crisis financiero…for di unda e placa necesario lo bini…..? PPA su contesta ….e imagen di un pais ta worde projecta den un maneho cultural ‘real’ y tin un dicho hulandes ta bisa…..’wat niet uit de lengte komt, komt uit de breedte’ ,,,,!!

Crisisnan manera esun actual entre Gobierno di Aruba, SMAC y MUSICA cu a conduci na un crisis y un punto abao di nos Carnaval/Calypso y Soca Monarch Festival….mester worde usa pa dedica atencion na un miho vision, coordinacion y cooperacion den futuro. Asina so nos lo por hiba Aruba dilanti !!

Aruba, 9 di januari 2016
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co