NO persecucion politico 

STA. CRUZ -- Minister Otmar Oduber ta referi constantemente na persecucion politico door di MEP pa 7 anja contra su persona. Pero aki Otmar Oduber ta ganja, y kier crea simpatia.
E investigacion cu e ta referi na dje no tabata un persecucion politico, e tabata un persecucion criminal door di Ministerio Publico cu tabata actua los di gobierno di MEP, tempo cu Ministerio Publico tabata tin curashi.
E no tabata un persecucion politico, e tabata un investigacion den cual a horta 50 miyon florin di placa di pueblo! Claro cu Ministerio Publico mester a tuma su tempo pa investiga unda tur e 50 miyon florin ey a bai. Nada di persecucion politico, simplemente un investigacion di ladronicia di 50 miyon florin, den cual UN TAL Otmar tabata forma parti.
E caso a tuma hopi anja, y na final Otmar Oduber a sali liber pasobra hues a haya cu no ta suficientemento prueba cu E TAL OTMAR cu a pidi placa bou mesa, ta OTMAR ODUBER. Pueblo si sa kiko a pasa pero pa e hues no tabata tin suficiente prueba.
Ademas, ministerio publico a apela e sentencia ey, pasobra segun ministerio publico Otmar Oduber tabata parti di e ladronicia di 50 miyon florin. Pero den un deal cu te dia di awe ta keda e deal di mas misterioso di Aruba, bou un palo na Boca Catalina, e abogado di Otmar Oduber a logra pa Ministerio Publico retira e caso den apelacion, pa asina Otmar por a bira minister.
Esun cu si a wordo condena tabata Tico Croes e tempo ey LIDER DI PARTIDO AVP, pa e mesun corupcion.

Persecucion politico ta loke Otmar tin 6 anja ta hasiendo: ATA, DOPV, SANTA ROSA, LABOR, LUCHTVAART, SCHEEPVAART tur e camindanan ey Otmar Oduber a core cu hendenan di MEP pa nombra su mesun hendenan y su compinchinan. Esey ta abuso, un abuso cu ainda e mester paga p'e.

Ta bon pa Otmar Oduber bisa e berdad completo, stop di yora di persecucion politico, y bisa cu CASO FONDO DESAROYO SAN NICOLAS e tabata un investigacion criminal di hortamento di 50 miyon florin den cual UN TAL OTMAR tambe a haya miyones!

Expresionnan haci den e articulo aki no necesariamente ta refleha opinion di ArenaPoliti.co